មន្ត្រីមួយចំនួននៅមជ្ឈិមបូព៌ា និងសហរដ្ឋអាមេរិកជឿថា កម្រិតនៃការបំផ្លិចបំផ្លាញនៅតំបន់ហ្កាហ្សាស្ទ្រីបដែលបណ្តាលមកពីការវាយលុករបស់អ៊ីស្រាអែលរយៈពេល ៩ ខែ ទំនងជាបានជួយជំរុញក្រុមហាម៉ាស ឲ្យបន្ធូរបន្ថយការទាមទាររបស់ខ្លួនសម្រាប់កិច្ចព្រមព្រៀងបទឈប់បាញ់។ 

កាលពីចុងសប្តាហ៍ ក្រុមហាម៉ាស ហាក់ដូចជាបានទម្លាក់ការទាមទារដ៏យូរអង្វែងរបស់ខ្លួន ដែលអ៊ីស្រាអែលសន្យាថា នឹងបញ្ចប់សង្គ្រាមជាផ្នែកនៃកិច្ចព្រមព្រៀងឈប់បាញ់ណាមួយ។ ការផ្លាស់ប្តូរភ្លាមៗ បានបង្កើនក្តីសង្ឃឹមថ្មីសម្រាប់ការរីកចម្រើនក្នុងការចរចាដែលសម្របសម្រួលដោយអន្តរជាតិ។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ កាលពីថ្ងៃអាទិត្យ បានអួតថា សម្ពាធយោធារួមទាំងការវាយលុករយៈពេលពីរខែរបស់អ៊ីស្រាអែលដែលកំពុងបន្ត នៅក្នុងទីក្រុងរ៉ាហ្វា ភាគខាងត្បូងនៃតំបន់ហ្កាហ្សា គឺជាអ្វីដែលនាំឲ្យក្រុមហាម៉ាស ចូលទៅក្នុងការចរចា»។

ក្រុមហាម៉ាស ដែលជាក្រុមសកម្មប្រយុទ្ធឥស្លាម ដែលព្យាយាមបំផ្លិចបំផ្លាញអ៊ីស្រាអែល និងបានកាន់កាប់តំបន់ហ្កាហ្សា ក្នុងឆ្នាំ ២០០៧ គឺមានភាពសម្ងាត់ខ្ពស់ ហើយត្រូវបានគេដឹងតិចតួចអំពីការងារផ្ទៃក្នុងរបស់ក្រុមនេះ។