ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់​បានអញ្ជើញ​ដឹកនាំ​កិច្ច​ប្រជុំ​បន្ទាន់​មួយ ដើម្បីត្រួតពិនិត្យ និងពង្រឹងប្រសិទ្ធភាពការអនុវត្តការផ្តល់សេវារដ្ឋបាល ជូនប្រជាពលរដ្ឋ នៅ​អង្គភាពច្រកចេញចូលតែមួយ និងការរិយាល័យច្រកចេញចូលតែមួយតាមក្រុងស្រុកទាំង០៧ ។ កិច្ច​ប្រជុំនេះ បានរៀបចំឡើងនៅថ្ងៃទី៩ ខែកក្កដា ឆ្នាំ២០២៤ នៅ​សាល​ប្រជុំ​សាលា​ខេត្ត​ពោធិ៍សាត់​ ដោយមានការចូលរួមពីអង្គភាពច្រកចេញចូលតែមួយ អភិបាលក្រុងស្រុក ក្រុម​ប្រឹក្សា​ឃុំ-​សង្កាត់ និងមន្ទីរ អង្គភាពពាក់ព័ន្ធសរុបប្រមាណ១៥០នាក់ ។

ក្នុងឱកាសដឹកនាំកិច្ចប្រជុំនេះ ឯកឧត្តម ខូយ រីដា បានសង្កត់ធ្ងន់លើចំនុច២ធំៗ ទី១ គឺ​ស្ថាប័ន​ពាក់ព័ន្ធ​នានាត្រូ​វ​ខិតខំ​យក​ចិត្ត​ទុកដាក់​ពន្លឿន​ការ​ផ្តល់​សេវា​ជូន​ប្រជាពលរដ្ឋ​ឲ្យ​បាន​ឆាប់​រហ័ស​ពិសេស​បញ្ហា​ចុះបញ្ជីដីធ្លី ការលក់ ការទិញ ការផ្ទេរមរតកដីធ្លីពីឪពុក ម្តាយ ទៅកូននិងពីកូន​ទៅ​ឪពុក ម្តាយ ពីបងទៅប្អូន ពីប្អូនទៅបងជាដើម ដែលកន្លងមកមានភាព​យឺតយ៉ាវ ។ ទី២គឺ ការស្នើរសុំកែ សំបុត្រកំណើត ដែលមានខុសឈ្មោះ ខុសកន្លែងកំណើត និងខុសទិន្នន័យ​ផ្សេងៗ​របស់​ប្រជាពលរដ្ឋ ដោយឯកឧត្តម ខូយ រីដា បានសម្រេចបង្កើតក្រុមការងារពិសេសមួយ ដើម្បី​ជួយ​សម្រួល និងពន្លឿនការងារនេះជូនប្រជាពលរដ្ឋ ដោយមានឯកឧត្តម លាង ពេជ្រ សមាជិក​ក្រុម​ប្រឹក្សា​ខេត្តជាអ្នកទទួលបន្ទុក ។

នៅពេលទទួលបាន ការស្នើរសុំកែសំបុត្រកំណើត ឬអត្តសញ្ញាណប័ណ្ណ ពីប្រជាពលរដ្ឋ​តាម​បណ្តា​ភូមិ ឃុំ ក្រុង ស្រុក ហើយក្នុងករណីដែលមន្ត្រីអត្រានុកូលដ្ឋាន មិនអាចកែតម្រូវបាន ក្រុម​ការងារ​នឹង​ជួយ​សម្របសម្រួលបងប្អូនក្នុងការដាក់ពាក្យសុំទៅសាលាដំបូងខេត្ត ដើម្បីចេញ​សេចក្តី​សម្រេច បង្គាប់មកមន្ត្រីអត្រានុកូលដ្ឋានឱ្យកែតម្រូវ ។ បន្ថែម​លើនោះ​សម្រាប់​ប្រជាពលរដ្ឋ​មាន​ជីវភាព​ខ្វះខាត ក្រុមការងារនឹងជួយឧបត្ថម្ភថ្លៃធ្វើដំណើរ ។

បើតាម លោក ផាត់ សុផល ប្រធានអង្គភាពច្រកចេញចូលតែមួយខេត្តពោធិ៍សាត់ បាន​ជម្រាប់​ជូន​ថា រយៈពេល៦ខែ ក្នុងឆ្នាំ២០២៤នេះ អង្គភាពច្រកចេញចូលតែមួយខេត្តពោធិ៍សាត់ បាន​ផ្តល់​សេវា​សរុបចំនួន៨៩៥៤មុខសេវា ក្នុងនោះការផ្តល់សេវារដ្ឋបាលលើវិស័យរៀបចំដែនដី នគរូប​នីយកម្ម និងសំណង មានចំនួន៤៥៨៩មុខសេវា ដោយផ្តល់​លទ្ធផល​សម្រេច​ចំនួន​២៨៦៤​មុខ​សេវា និងកំពុងដំណើរការមានចំនួន១៧២៥មុខសេវា ក្នុងនោះបញ្ហាប្រឈមដូចជា មាន​ភាព​យឺត​យ៉ាវ​លើ​មុខសេវា លើការចុះបញ្ជីការផ្ទេរកម្មសិទ្ធ (ទិញ-លក់ ,អំណោយ , ការធ្វើសន្តតិកម្ម )៕ អត្ថបទ និងរូបភាព ៖ ភិរុណ ពៅ