រដ្ឋមន្ត្រីក្រសួងការពារជាតិលោក Shin Won-sik បានអំពាវនាវឲ្យមានការត្រៀមលក្ខណៈយោធាយ៉ាងម៉ឺងម៉ាត់ នៅថ្ងៃអង្គារនេះ ដោយសង្កត់ធ្ងន់ថា កម្លាំងដ៏មានអានុភាព គឺជាមធ្យោបាយតែមួយគត់ ដើម្បីរក្សាសន្តិភាព ក្នុងការប្រឈមមុខនឹងការគំរាមកំហែងដែលកំពុងវិវឌ្ឍន៍របស់កូរ៉េខាងជើង។

លោក Shin បានធ្វើការអត្ថាធិប្បាយក្នុងអំឡុងពេលកិច្ចប្រជុំនៃមេបញ្ជាការយោធាជាន់ខ្ពស់ បន្ទាប់ពីការបាញ់មីស៊ីលរបស់កូរ៉េខាងជើង យុទ្ធនាការបង្ហោះបាឡុងដែលផ្ទុកសំរាម និងការវាយប្រហារដោយប្រព័ន្ធ GPS នៅឆ្នាំនេះ។

លោក បាននិយាយថា៖ «កម្លាំងដ៏មានអានុភាព គឺជាមធ្យោបាយតែមួយគត់ ដើម្បីការពារសន្តិភាព ក្នុងសាធារណរដ្ឋកូរ៉េពីការគំរាមកំហែងរបស់កូរ៉េខាងជើង»។ «យើងត្រូវតែចងចាំមេរៀនប្រវត្តិសាស្ត្រថា ការសងសឹកដោយផ្អែកលើកម្លាំងដ៏ខ្លាំងក្លា គឺជាការការពារ ហើយការការពារខ្លួនឯង គឺជាសន្តិភាព»។

«ទង្វើខ្វះការពិចារណារបស់កូរ៉េខាងជើង ដែលបំផ្លាញសន្តិភាព នឹងនាំទៅដល់ការបំផ្លាញរបបនេះ តែប៉ុណ្ណោះ»។

កូរ៉េខាងជើង បានអនុវត្តការញុះញង់ជាបន្តបន្ទាប់ប្រឆាំងនឹងកូរ៉េខាងត្បូង បន្ទាប់ពីមេដឹកនាំ គីម ជុងអ៊ុន បានអំពាវនាវឲ្យកែប្រែរដ្ឋធម្មនុញ្ញរបស់ខ្លួន ដើម្បីកំណត់ប្រទេសកូរ៉េខាងត្បូងជា «សត្រូវចម្បង» និងកំណត់ការប្តេជ្ញាចិត្តក្នុងការដណ្តើមកាន់កាប់ទឹកដីកូរ៉េខាងត្បូង ក្នុងករណីមានសង្រ្គាម។