ម្តាយជនប៉ាឡេស្ទីន Ghaneyma Joma អង្គុយលើឥដ្ឋមន្ទីរពេទ្យ Nasser ស្ថិតក្នុងទីក្រុង Khan Younis ជាប់កូនប្រុស Younis Jomaរបស់គាត់ ដែលស្ថានភាពសុខភាពកូនកាន់តែធ្ងន់ធ្ងរទៅ ចាប់តាំងពីសង្រ្គាមផ្ទុះឡើង ។ 

អ្នកស្រី និយាយថា វាពិបាកភ្នែកមើលខ្លាំងណាស់ ពេលឃើញកូនរបស់ខ្ញុំបែបនេះ វាប្រៀបបាននឹងកូនខ្ញុំស្លាប់នៅនឹងភ្នែករបស់ខ្ញុំអញ្ចឹង ដោយសារតែកង្វះអាហារូបត្ថម្ភ ខ្ញុំមិនអាចផ្តល់អ្វីដល់កូនបាន ដោយសារតែសង្រ្គាម ។ 

ក្មេងប្រុស Younis ស្ថិតនៅក្នុងចំណោមក្មេងប៉ាឡេស្ទីនជាច្រើនទៀត ដែលរងផលប៉ះពាល់ដោយសារសង្រ្គាម ពេលដែលការផ្គត់ផ្គង់ស្បៀងអាហារ និងទឹកមានដែនកំណត់ ។ 

មន្ទីរពេទ្យ Nasser ជួបការលំបាកជាខ្លាំង ដោយសារចំនួនអ្នកជំងឺច្រើន ហើយសេវាកម្មមានការកំណត់ ។ 

អ្នកស្រីវេជ្ជបណ្ឌិត Mervat Al-Qatati និយាយថា មន្ទីរពេទ្យ Nasser មិនអាចទប់ទល់នឹងលំហូរអ្នកជំងឺបានទេ ។ 

អ្នកស្រីបន្តថា ករណីក្មេងៗឈឺទាំងអស់ សុទ្ធតែឆ្លងមេរោគដើមទ្រូង បញ្ហារំលាយអាហារ ការឆ្លងមេរោគថ្លើម និងរលាកស្រោមខួរ ហើយពួកយើងមានការក្រៀមក្រំជាខ្លាំង នៅពេលមើលឃើញអ្នកជំងឺដេកលើឥដ្ឋបែបនេះ ៕