ក្រុមហ៊ុនបច្ចេកវិទ្យាយក្សរបស់កូរ៉េខាងត្បូង គឺក្រុមហ៊ុន Samsung នៅថ្ងៃអង្គារ (ទី៩ ខែកក្កដា) នេះ បានប្រាប់ឲ្យដឹងថា ផលិតកម្មមិនត្រូវបានរំខាននោះទេ បើទោះបីជាមានកូដកម្មទូទៅរយៈពេល ៣ថ្ងៃ ដោយកម្មកររាប់ពាន់នាក់ក៏ដោយ។

ក្រុមហ៊ុននេះបាននិយាយថា សមាជិកជាង ៥.០០០នាក់របស់សហជីពអេឡិចត្រូនិក Samsung ជាតិ (National Samsung Electronics Union) បានឈប់ធ្វើការ កាលថ្ងៃចន្ទ (ទី៨ ខែកក្កដា) ដែលជាផ្នែកមួយនៃការតស៊ូ ដែលមានរយៈពេលដ៏យូរ ពាក់ព័ន្ធនឹងប្រាក់ខែ និងអត្ថប្រយោជន៍ផ្សេងៗ។

គួរបញ្ជាក់ផងដែរថា សហជីពនេះ មានសមាជិកជាង ៣០.០០០នាក់ ដែលច្រើនជាង ១ភាគ៥នៃកម្លាំងការងារសរុបរបស់ក្រុមហ៊ុន។

ប្រព័ន្ធផ្សព្វផ្សាយ ក្នុងស្រុក បានដកស្រង់សម្ដីរបស់ក្រុមហ៊ុន Samsung ដែលនិយាយថា៖ «មិនមានការរំខានដល់ផលិតកម្មនោះទេ»។ តែលោកស្រី Park Seol សមាជិកជាន់ខ្ពស់នៃសហជីព បានប្រាប់សារព័ត៌មាន AFP នៅថ្ងៃទី៩ ខែកក្កដានេះថា ផលិតកម្មកំពុងរងផលប៉ះពាល់។

សហជីពជាមួយអ្នកគ្រប់គ្រងក្រុមហ៊ុន បានជជែកចរចាគ្នា ចាប់តាំងពីខែមករាមក ប៉ុន្តែភាគីទាំង២ មិនអាចឈានដល់កិច្ចព្រមព្រៀង ជុំវិញការខ្វែងគំនិតលើអត្ថប្រយោជន៍ផ្សេងៗ ហើយការស្នើសុំដំឡើងប្រាក់ខែ ៥,១ភាគរយពីក្រុមហ៊ុន ត្រូវបានច្រានចោល៕