ក្រុមបាល់ទាត់ជម្រើសជាតិអាហ្សង់ទីន ឈ្នះកាណាដា ២ទល់នឹង០ឡើងវគ្គផ្តាច់ព្រ័ត្រ ព្រឹកថ្ងៃទី១០ ខែកក្កដា ឆ្នាំ២០២៤ នៅសហរដ្ឋអាមេរិក។ មកដល់ពេលនេះ ពានធំប្រចាំតំបន់អាមេរិករៀបចំបាន៤៨លើកហើយ (១៩១៦-២០២៤)។

លេងបាន២២នាទីខ្សែប្រយុទ្ធ Manchester City, Julián Álvarez រកគ្រាប់បាល់នាំមុខឱ្យក្រុម មុនពេលដែលខ្សែប្រយុទ្ធ Inter Miami, Lionel Messi បន្ថែមគ្រាប់ទីពីរនៅនាទីទី៥១។ នាទីនៅសេសសល់គ្មានគ្រាប់បាល់បន្ថែមទៀតនោះទេ។

នេះជាលើកទី៣០ (គិតតាំងពីបង្កើតពាន១៩១៦ដល់២០២៤)ដែលអាហ្សង់ទីនឡើងវគ្គផ្តាច់ព្រ័ត្រ ខណៈដែល២៩លើកកន្លងមកអាហ្សង់ទីនឈ្នះពាន១៥ដង និងជើងឯករង១៤ដង៕