ឯកឧត្តម ខាំបៃ ដាំឡាត់ អនុប្រធានរដ្ឋសភាឡាវ និងជាប្រធានសមាគមមិត្តភាពឡាវ-កម្ពុជា នៅព្រឹកថ្ងៃទី៩ ខែកក្កដា ឆ្នាំ២០២៤នេះ បានអញ្ជើញ​ដឹកនាំ​គណៈ​ប្រតិភូ​ទៅ​ទស្សនា​នូវ​វិមា​ន​ឈ្នះ ឈ្នះ និងសិក្សាស្វែងយល់ អំពីការបញ្ចប់សង្រ្គាមស៊ីវិលនៅកម្ពុជា ខណៈដំណើរ​ទស្សន​កិច្ច​នេះ​ឯកឧត្តម​បានចាត់ទុកថា វិមានឈ្នះ ឈ្នះ ឬសារមន្ទីរជាតិតេជោ ជាកន្លែងដ៏សំខាន់​មួយ​នៃ ​ប្រវត្តិសាស្រ្ត​កម្ពុជា។

សំណេរតាមរយៈក្រាំងមាសនៅវិមាន ឈ្នះ ឈ្នះ ឯកឧត្តម ខាំបៃ ដាំឡាត់ បានលើកឡើងថា គណៈប្រតិភូសមាគមមិត្តភាពឡាវ និងកម្ពុជា ពិតជាសប្បាយចិត្ត និងសូមសម្តែងការដឹងគុណ និង​អរគុណក្នុងការ ទទួលបដិសណ្ឋារកិច្ចយ៉ាងកក់ក្តៅរបស់កម្ពុជាចំពោះឯកឧត្តម និង​គណៈ​ប្រតិភូ​របស់​ឡាវ។

ឯកឧត្តមបានបញ្ជាក់ថា«គណៈប្រតិភូសមាគមមិត្តភាពឡាវ-កម្ពុជា ថ្នាក់​កណ្តាល​សូម​សម្តែង​ការគួរសម និងរីករាយ​យ៉ាងខ្លាំង​ដែល​បាន​ដឹកនាំ​គណៈ​ប្រតិភូ​ចូល​ទស្សនា​សារ​មន្ទីរជាតិ​តេជោ​(វិមាន ឈ្នះ ឈ្នះ) ដែលជាកន្លែងដ៏សំខាន់របស់ប្រវត្តិសាស្រ្តកម្ពុជា ជាការផ្លាស់ប្តូររបបគ្រប់គ្រង និង​បញ្ចប់សង្រ្គាមស៊ីវិល ក្រោម ការដឹកនាំរបស់សម្តេចតេជោ ហ៊ុន សែន ដែលជា​បុគ្គល​ចាប់​ផ្តើម​សាង និងអភិវឌ្ឍប្រទេសកម្ពុជាឲ្យមាន ភាព រីកចម្រើន»។ ជាមួយ​គ្នា​នោះដែរ​ឯកឧត្តម​បាន​រំពឹង​ថា ទំនាក់ទំនងរវាងឡាវ និងកម្ពុជា នឹងគង់វង្សយូរអង្វែងជា រហូតផងដែរ។

សូមបញ្ជាក់ថា ក្រៅពីអញ្ជើញដឹកនាំគណៈប្រតិភូទៅទស្សនា និងសិក្សាប្រវត្តិសាស្រ្តនៅវិមាន ឈ្នះ ឈ្នះ នាថ្ងៃទី៩ ខែកក្កដា នេះដែរ ឯកឧត្តមខាំបៃ ដាំឡាត់ ក៏បាន​ជួប​ពិភាក្សា​ការងារ​មួយ​ចំនួន​ជាមួយ ឯកឧត្តម ញ៉ែម វ៉ាលី អនុប្រធានអចិន្ត្រៃយ៍ និង ជា​អគ្គលេខាធិការ​ក្រុម​ប្រឹក្សា​ជាតិ​រណ​សិរ្ស​សាមគ្គី អភិវឌ្ឍន៍មាតុភូមិកម្ពុជា និងក៏​បាន​ចូល​ទៅ​ទស្សនា​នៅ​សារមន្ទីរ​ជាតិ​កម្ពុជា​ផង​ដែរ​៕ អត្ថបទ បាន ចក់