ក្រសួងការពារជាតិរុស្ស៊ី បាននិយាយក្នុងរបាយការណ៍មួយលើកម្មវិធីផ្ញើសារតេលេក្រាមកាលពីថ្ងៃអង្គារ (០៩ កក្កដា) ថា កងកម្លាំងរបស់ខ្លួនបានគ្រប់គ្រងតំបន់តាំងទីលំនៅ យ៉ាស្នូប្រូឌីវកា (Yasnobrodivka) ក្នុងតំបន់ ដូណិតស្ក៍ (Donetsk) ភាគខាងកើតអ៊ុយក្រែន។ ប៉ុន្តែអ៊ុយក្រែន មិនបានទទួលស្គាល់ការខាតបង់បែបនេះទេ ហើយបានកំណត់ភូមិនេះថាជាទីតាំងមួយក្នុងចំណោមភូមិមួយចំនួនដែលកម្លាំងរបស់ខ្លួនកំពុងការពារទីតាំងឈរជើង។

ក្រសួងការពារជាតិរុស្ស៊ី នៅក្នុងរបាយការណ៍ប្រចាំថ្ងៃរបស់ខ្លួននៅសមរភូមិមុខបាននិយាយថា «ជាលទ្ធផលនៃសកម្មភាពដ៏ខ្លាំងក្លា អង្គភាពនៃកងកម្លាំង 'កណ្តាល' បានរំដោះតំបន់តាំងលំនៅ យ៉ាស្នូប្រូឌីវកា ហើយនិងធ្វើឱ្យប្រសើរឡើងនូវទីតាំងយុទ្ធសាស្ត្ររបស់ពួកគេ»។

អគ្គសេនាធិការអ៊ុយក្រែនបាននិយាយថា ភូមិនេះគឺជាភូមិមួយក្នុងចំណោមភូមិចំនួនប្រាំបួននៅក្នុងផ្នែក ផូក្រូវស្ក៍ (Pokrovsk) នៃតំបន់ ដូណិតស្ក៍ ភាគខាងលិចនៃភូមិ ដូណិតស្ក៍ ដែលគ្រប់គ្រងដោយរុស្ស៊ី ហើយជាទីដែលកងកម្លាំងរបស់ខ្លួនបានទប់ទល់នឹងការប៉ុនប៉ងរបស់រុស្ស៊ីជាង ២០ លើកដើម្បីវាយរុលក្នុងរយៈពេល ២៤ ម៉ោងមកនេះ។

យោធារុស្ស៊ីបាននិយាយថា ខ្លួនបានដណ្តើមយកភូមិជាច្រើននៅការវាយរុលយឺតៗរបស់ខ្លួនឆ្លងកាត់តំបន់ ដូណិតស្ក៍ របស់អ៊ុយក្រែន បន្ទាប់ពីខ្លួនបានដណ្តើមយកទីក្រុង អាវឌីអ៊ីវកា (Avdiivka) ដ៏សំខាន់កាលពីខែកុម្ភៈ។ ប្លុក ឌីបស្តេត (DeepState) ដែលជាប្លុកយោធាអ៊ុយក្រែនដ៏ពេញនិយម មិនបាននិយាយអំពីភូមិ យ៉ាស្នូប្រូឌីវកា នេះនៅក្នុងគេហទំព័រស្ដីពីសមរភូមិរបស់ខ្លួនទេ ប៉ុន្តែបានរាយការណ៍ពីការប្រយុទ្ធគ្នាយ៉ាងខ្លាំងនៅក្នុងតំបន់ក្បែរនោះ៕