អង្គការ UNHCR បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ស្នងការជាន់ខ្ពស់ទទួលបន្ទុកជនភៀសខ្លួនរបស់អង្គការសហប្រជាជាតិ (UNHCR) លោក Filippo Grandi បានអំពាវនាវឱ្យមានការជំរុញកិច្ចខិតខំប្រឹងប្រែងឈានទៅរកដំណោះស្រាយរយៈពេលវែង សម្រាប់ជនភៀសខ្លួនអាហ្វហ្គានីស្ថាន នៅក្នុងប្រទេសប៉ាគីស្ថាន។

សេចក្តីថ្លែងការណ៍បាននិយាយថា លោក Filippo Grandi បានអំពាវនាវឱ្យមានការកំណត់ឡើងវិញជាបន្ទាន់ នូវគំរូជំនួយឈានទៅរកដំណោះស្រាយ និងការចែករំលែកការទទួលខុសត្រូវ រួមទាំងការជំរុញភាពជាដៃគូថ្មី និងបង្កើតវិធីសាស្រ្តប្រកបដោយភាពឈ្លៀសវៃក្នុងការដោះស្រាយស្ថានភាពភៀសខ្លួន ដែលបានអូសបន្លាយពេល។

មន្ត្រីដដែលបាននិយាយថា យើងត្រូវឈ្លៀតយកឱកាសនេះ ដើម្បីពន្លឿនដំណោះស្រាយ និងមានចក្ខុវិស័យកាន់តែទូលំទូលាយ សម្រាប់ប្រជាជនអាហ្វហ្គានីស្ថាននៅក្នុងប្រទេសប៉ាគីស្ថាន។ ស្នងការជាន់ខ្ពស់ បានស្នើឱ្យធ្វើការឆ្ពោះទៅរកកិច្ចសន្ទនាមួយនៅចុងឆ្នាំនេះ ដែលនឹងជួបប្រជុំភាគីពាក់ព័ន្ធសំខាន់ៗ រួមមានអ្នកតំណាងរដ្ឋាភិបាល តួអង្គអភិវឌ្ឍន៍និងវិស័យឯកជន ដើម្បីបង្កើតកញ្ចប់ដំណោះស្រាយដែលផ្តល់ផលប្រយោជន៍ដល់ប្រជាជនអាហ្វហ្គានីស្ថាន កំពុងរស់នៅក្នុងប្រទេសប៉ាគីស្ថាន ។

សេចក្តីថ្លែងការណ៍បាននិយាយថា លោក Grandi បានប្តេជ្ញាចិត្តចំពោះកិច្ចខិតខំប្រឹងប្រែងទ្វេដងក្នុងគោលបំណងបង្កើតលក្ខខណ្ឌអំណោយផលក្នុងការវិលត្រឡប់ទៅកាន់ប្រទេសអាហ្វហ្គានីស្ថានវិញ រួមទាំងទស្សនៈនៃលក្ខខណ្ឌសម្ភារៈ ការទទួលបានសេវានានា និងឱកាសការងារ ដើម្បីត្រួសត្រាយផ្លូវសម្រាប់ការវិលត្រឡប់ទៅវិញដោយស្ម័គ្រចិត្ត នៅពេលខាងមុខ។

ក្នុងអំឡុងដំណើរទស្សនកិច្ច លោក Grandi បានជួបជនភៀសខ្លួនអាហ្វហ្គានីស្ថាន នៅក្នុងក្រុង ដែលពួកគេបានប្រាប់លោកអំពីកង្វល់ និងបង្ហាញពីបំណងក្នុងការរួមចំណែកដល់សហគមន៍របស់ពួកគេនៅក្នុងប្រទេសប៉ាគីស្ថាន និងចុងក្រោយនៅក្នុងប្រទេសអាហ្វហ្គានីស្ថាន។

យោងតាមអង្គការ UNHCR បានឲ្យដឹងថា ប្រទេសប៉ាគីស្ថាន បានទទួលប្រជាជនអាហ្វហ្គានីស្ថានប្រហែល៣លាននាក់ ដោយអ្នកមួយចំនួនរស់នៅក្នុងប្រទេសនេះជាច្រើនជំនាន់មកហើយ។