អគ្គលេខាធិការរបស់អង្គការណាតូ (NATO) លោក Jens Stoltenberg កាលពីថ្ងៃអង្គារ (ទី៩ ខែកក្កដា) បាននិយាយថា សម្ព័ន្ធភាពយោធាមួយនេះ បានបញ្ជាទិញមីស៊ីលប្រឆាំងយន្តហោះប្រភេទ Stinger ដែលមានតម្លៃជិត ៧០០លានដុល្លារ តាងនាមឲ្យប្រទេសជាសមាជិកមួយចំនួន។

លោក Stoltenberg បានប្រាប់ការកិច្ចប្រជុំនៃមេដឹកនាំឧស្សាហកម្មការពារជាតិ នៅខាងក្រៅកិច្ចប្រជុំកំពូលរបស់អង្គការណាតូនៅទីក្រុងវ៉ាស៊ីនតោនថា៖ «ទើបតែថ្ងៃនេះ ទីភ្នាក់ងារលទ្ធកម្មរបស់អង្គការណាតូ (NSPA) បានចុះហត្ថលេខាលើកិច្ចសន្យាពហុជាតិថ្មីមួយ សម្រាប់មីស៊ីល Stinger ដែលមានតម្លៃជិត ៧០០លានដុល្លារ»។  

កិច្ចព្រមព្រៀងចុងក្រោយ ដើម្បីទិញមីស៊ីល Stinger ដែលធ្វើឡើងដោយនាយកដ្ឋាន Raytheon របស់ក្រុមហ៊ុន RTX ត្រូវបានផ្តល់ឲ្យនៅក្នុងខែឧសភា ឆ្នាំ២០២២ នៅពេលដែលកងទ័ពសហរដ្ឋអាមេរិក បានចុះកិច្ចសន្យាទិញមីស៊ីលប្រឆាំងយន្តហោះតម្លៃ ៦២៥លានដុល្លារ ដើម្បីបំពេញស្តុកដែលត្រូវបានបញ្ជូនទៅអ៊ុយក្រែន។

គួរបញ្ជាក់ថា មីស៊ីលបាញ់ដោយលីលើស្មា Stinger មានតម្រូវការយ៉ាងខ្លាំង ក្នុងប្រទេសអ៊ុយក្រែន ជាកន្លែងដែលពួកគេបានបញ្ឈប់ការវាយលុករបស់រុស្សីពីលើអាកាសដោយជោគជ័យ ហើយនៅក្នុងបណ្តាប្រទេសជិតខាងអឺរ៉ុបដែលភ័យខ្លាចថា ពួកគេក៏អាចនឹងត្រូវបានវាយប្រហារដោយកងកម្លាំងរុស្ស៊ីផងដែរ។

អ្នកនាំពាក្យរបស់ក្រុមហ៊ុន RTX បានប្រាប់សារព័ត៌មាន Reuters ថា ការបញ្ជាទិញរបស់អង្គការណាតូសម្រាប់មីស៊ីល Stingers នឹងរក្សាខ្សែច្រវ៉ាក់ផលិតកម្ម រហូតដល់ឆ្នាំ២០២៩៕