អគ្គលេខាធិការដ្ឋានរដ្ឋសភា នៅព្រឹកថ្ងៃទី១០ ខែកក្កដា ឆ្នាំ២០២៤ បានអញ្ជើញ​ ឯកឧត្តម​បណ្ឌិត ជឺនបូរាណ ច័ន្ទបូរី ឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសអូស្រ្តាលី និង​ណូវែល​ហ្សេឡង់ និងជាសមាជិកក្រុមទីប្រឹក្សារដ្ឋសភា មកកាន់វិមានរដ្ឋសភា ដើម្បីធ្វើបទ​បង្ហាញ​ស្ដីពី​«ស្ថានភាពនយោបាយសកល៖ សណ្តាប់ធ្នាប់ពិភពលោក ឬពិភពលោកគ្មានសណ្តាប់ធ្នាប់» ជូន​ដល់​មន្ត្រីនៃអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន និងអគ្គនាយកដ្ឋាន​នីតិកម្ម​ និងស្រាវជ្រាវ ចំនួនជាង៥០រូប បានសិក្សាស្វែងយល់។

ការរៀបចំ​កម្ម​វិធីធ្វើបទបង្ហាញនេះឡើង គឺដើម្បីចែករំលែក​ចំណេះ​ដឹង​អំពី​ស្ថាន​ភាព​នយោបាយ​ពិភព​​លោកនាពេលបច្ចុប្បន្ន ដល់មន្ត្រីនៃអគ្គនាយកដ្ឋានទាំងពីរបានយល់ដឹងកាន់តែទូលំទូលាយ សម្រាប់​ជាប្រយោជន៍នៅក្នុងការបំពេញការងារ ជូនថ្នាក់ដឹកនាំរដ្ឋសភា ក៏ដូចជាតំណាងរាស្រ្ត ទាក់​ទង​ទៅនឹងវិស័យការទូតសភា ការងារស្រាវជ្រាវឯកសារ បម្រើឱ្យកិច្ច​ប្រជុំ​ជា​លក្ខណៈ​អន្តរជាតិ​នានា រវាងសភាកម្ពុជា ជាមួយសភានៃបណ្ដាប្រទេសជាមិត្តនៅលើសកលលោក ក៏​ដូច​ជា​ការងារសរសេរព័ត៌មានឱ្យបានត្រឹមត្រូវទៅតាមបរិបទជាក់ស្ដែងរបស់ស្ថាប័នរដ្ឋសភា ពាក់ព័ន្ធ​នឹង​វិស័យ​ការងារការទូតសភា។