នគរបាលអគ្គីភ័យ បានបន្តការចុះធ្វើសមយុទ្ធតាមផ្សារទំនើបអ៊ីអន១ ដើម្បីធ្វើបទ​បង្ហាញ​ពី​របៀប​បង្ការ និងពន្លត់អគ្គិភ័យ ដល់ក្រុមការងារបុគ្គលិកផ្សារទាំងអស់ ដើម្បីបញ្ចៀប​ការ​យល់​ដឹង​កាន់​តែ​ទូលំ​ទូលាយ​ពីវិធានបង្ការ ។

កម្លាំងនគរបាល នៃនាយកដ្ឋានពន្លត់ និងបង្ការអគ្គីភ័យ នៃអគ្គស្នងការដ្ឋាននគរបាលជាតិ នា​ព្រឹក​ថ្ងៃ​ទី១០ ខែកក្កដា ឆ្នាំ២០២៤នេះ បានបន្តការធ្វើសមយុទ្ធនៅផ្សារទំនើបអ៊ីអនទី១ ដើម្បី​ធ្វើ​បទ​បង្ហាញ និងបង្រៀនការអនុវត្ត ដល់ក្រុមបុគ្គលិកផ្សារ ឱ្យយល់ដឹងច្បាស់ពីវិធីបង្ការ និង​វិធី​ធ្វើ​ការ​​សង្គ្រោះបឋម នៅពេលមានគ្រោះអគ្គីភ័យកើតមានឡើង ។

លោកឧត្តមសេនីយ៍ឯកនេត វន្ថា ប្រធាននាយកដ្ឋានពន្លត់ និងបង្ការអគ្គីភ័យ បានប្រាប់ឱ្យដឹងថា  នគរបាលជំនាញ តែងតែបានចុះជាញឹកញ៉យតាមបណ្តាផ្សារធំៗ ក្នុង​ការ​ចុះ​ធ្វើ​សមយុទ្ធ​បទ​បង្ហាញពីជំនាញបង្ការ និងសង្គ្រោះ ព្រោះនេះ គឺជាកិច្ចការងារសម្ខាន់ដែលត្រូវយកចិត្តទុកដាក់ និង​គិតគូរឱ្យបានមុន មុនពេលកើតមានគ្រោះអគ្គីភ័យ ដែលតែងបង្ការជាវិនាសកម្មធ្ងន់ធ្ងរ ។

លោកឧត្តមសេនីយ៍ បន្តថា ផ្សារទំនើបអ៉ីអន តែងតែ​បាន​សហការ​ជាមួយ​នគរបាល​ជំនាញ​ជា​និច្ចក្នុងការអនុញ្ញាត្តិឱ្យនគរបាល ចុះធ្វើបទបង្ហាញ និងបង្រៀនពីវិធានសង្គ្រោះ ដល់បុគ្គលិក និង​ក្រុម​ការងារ ក្នុងផ្សារទាំងមូល ។

លោក ជូ សុវណ្ណារ៉ា អ្នកគ្រប់គ្រងទូទៅ នៃផ្សារទំនើបអ៉ីអន បានបង្ហាញក្តីរីករាយ និង​ពេញ​ចិត្ត​ចូល​រួម​ជាមួយនគរបាលជំនាញ ក្នុងសកម្មភាពបង្ហាត់ បង្រៀន ដល់ក្រុមបុគ្គលិកផ្សារ ឱ្យ​កាន់​តែ​មាន​ការ​យល់ដឹងច្បាស់ និងស្ទាត់ជំនាញ ក្នុងការបង្ការ និងសង្គ្រោះបឋម ដល់អថិតិជន បុគ្គលិក​រួម​ការងារ ឬបងប្អូនប្រជាពលរដ្ឋជាដើម នៅពេលមានគ្រោះអគ្គីភ័យកើតមានឡើងជាយថាហេតុ ។

ក្រុមបុគ្គលិកដែលបានចូលរួមហាត់សម ក្នុងសមយុទ្ធខាងលើនេះ បានយល់ឃើញថា  នេះ​គឺ​ជា​ឱកាស​ដែល​ពួកគាត់អាចទទួលបានចំណេះដឹងថ្មីបន្ថែមទៀត ពីការបង្ការទប់ស្កាត់ និង​សង្គ្រោះ​ជា​ជំហាន​បឋម ដើម្បីប្រើប្រាស់សម្រាប់ការជួយដល់អតិថិជន ក្នុងករណីមានអគ្គីភ័យកើតឡើង ។

សូមបញ្ជាក់ថា ការចុះធ្វើសមយុទ្ធនេះ នគរបាល នៃនាយកដ្ឋានអគ្គីភ័យខាងលើ តែង​បាន​ចុះ​ជាប់​លាប់ និងជាបន្តបន្ទាប់ តាមទីតាំងអាជីវកម្មធំៗ ក្រុមហ៊ុន រោងចក្រ និងផ្សារទំនើបធំៗ ជា​ដើម ដែលជាទីតាំងអាជីវកម្មមានបរិមាមនុស្សច្រើន ដូច្នោះហើយទើបនគរបាលជំនាញ ទាមទារ​ឱ្យ​បណ្តា​ទីតាំងទាំងនោះ ត្រូវមានបុគ្គលិក ឬក្រុមការងាររបស់ខ្លួន ចេះយល់​ដឹង​ឱ្យ​បាន​ច្បាស់​លាស់​ពីវិធីបង្ការទប់ស្កាត់ និងសង្គ្រោះបឋមពេលមានអគ្គីភ័យកើតឡើងក្នុងទីតាំងរបស់ខ្លួន៕ អត្ថបទ ៖ លីហេង