អាជ្ញាធមីន ប្រកាសបន្តគាំទ្រដល់ការអនុវត្តគម្រោងរបស់ JMAS តទៅទៀត ខណៈអង្គការ​នេះ​បាន​រួម​ចំណែកលើកកម្ពស់ដល់ជីវិភាពរស់នៅរបស់ប្រជាពលរដ្ឋកម្ពុជា នៅតាម​សហគមន៍​ក្រោយ​បោស​សម្អាត​មីន​រួច ខណៈអាជ្ញាមីននឹងបន្តរក្សាទំនាក់ទំនង និងវឌ្ឍនភាពរួមគ្នា​ជាមួយ​ជប៉ុន​ឲ្យ​កាន់​តែ​ខ្លាំង ដើម្បីជោគជ័យលើវិស័យសកម្មភាពមីននៅកម្ពុជា។

ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន ក្នុងពេល​ទទួល​ជួប​ពិភាក្សា​ការងារ​ជាមួយលោក YAMAZAKI Koji ប្រធាន JMAS និងសហការី ដើម្បីពង្រឹងភាពជាដៃគូ និង​កិច្ច​សហប្រតិបត្តិការក្នុងវិស័យសកម្មភាពមីននៅកម្ពុជានាវេលាថ្ងៃទី១០ ខែកក្កដា ឆ្នាំ ២០២៤ នៅ​ទីស្នាក់ការអាជ្ញាធរមីន បានថ្លែងអំណរគុណចំពោះការរួមចំណែក និងការគាំទ្ររបស់អង្គការ JMAS ជប៉ុន រយៈពេល ២២ឆ្នាំ ក្នុងសកម្មភាពបោសសម្អាតមីន និងសំណល់​ជាតិ​ផ្ទុះ​ពី​សង្រ្គាម​នៅ​កម្ពុជា។

ឯកឧត្តមបានវាយ តម្លៃខ្ពស់ចំពោះគម្រោង​បោស​សម្អាត​មីន​ដើម្បី​អភិវឌ្ឍន៍​សហគមន៍​នៅ​នឹង​កន្លែង​របស់ JMAS ដូចជាហេដ្ឋារ ចនាសម្ព័ន្ធ សាលារៀន និងកសិកម្ម ជាដើម។ ហើយការចូល រួមរបស់ JMAS ពិតជាបានរួម ចំណែកក្នុង​ការ​កាត់​បន្ថយ​ភាព​ក្រីក្រ​ផ្តល់​ដី​សុវត្ថិភាព និង​លើក​កម្ពស់​វិស័យកសិកម្មរបស់ប្រជាកសិករកម្ពុជា។

ជាការឆ្លើយតបលោក YAMAZAKI Koji បានអបអរ សាទរ​កម្ពុជា​ធ្វើ​ជាប្រធាន និង​ម្ចាស់​ផ្ទះ​នៃ​កិច្ច​ប្រជុំ​អនុ​សញ្ញាអូតាវ៉ាឆ្នាំ២០២៤ ព្រមទាំងបានជូនព​រ​ឱ្យកម្ពុ​ជា​ទទួល​បាន​ជោគជ័យ​ក្នុងដំ​ណើរ​ការ​រៀប​ចំ​កិច្ចប្រជុំនេះ។ លោកលើកឡើងថា រយៈពេល ២២ឆ្នាំ ចាប់តាំងពីឆ្នាំ២០០២ JMAS បានអ​នុវត្ត​សកម្មភាពបោសសម្អាតមីននិងគ្រាប់ និងការអភិវឌ្ឍសហគមន៍ក្នុងខេត្តបាត់ដំបង បន្ទាយ មាន​ជ័យ និងស្ទឹងត្រែង ដោយរំដោះបានផ្ទៃដីប្រមាណ ៦៥ គីឡូម៉ែត្រក្រឡា រកឃើញ​និង​កម្ទេច​ចោល​គ្រាប់​មីន​ចំនួន ២១.១៨៨គ្រាប់និងយុទ្ធភណ្ឌមិនទាន់ផ្ទុះ ៣៩៦.៣៦៤ គ្រាប់។ ប្រធាន JMAS បន្តទៀតថា JMAS នឹងបន្តពង្រីកគម្រោងបោសសម្អាតមីន និងសំណល់ជាតិ ផ្ទុះពី​សង្រ្គាម​បន្ថែមទៀត ស្របតាមផែនការយុទ្ធសាស្រ្តជាតិកម្ពុជា ព្រមទាំងស្នើ​សុំ​កម្ពុជា​ឱ្យ​បន្ត​ផ្តល់​នូវ​កិច្ច​សហការ និងគាំទ្រនូវគម្រោងទាំងនេះ៕ អត្ថបទ.ភារម្យ