តុលាការធម្មនុញ្ញរបស់ប្រទេសថៃ នៅថ្ងៃពុធ (ទី១០ ខែកក្កដា) នេះ បានកំណត់យកថ្ងៃទី២៤ ខែកក្កដា ជាថ្ងៃសវនាការបន្ទាប់ សម្រាប់សំណុំរឿងស្វែងរកការបញ្ចប់តំណែងនាយករដ្ឋមន្ត្រីរបស់លោក សេដ្ឋា ថាវីស៊ីន (Srettha Thavisin) ខណៈដែលខ្លួនកំពុងស្វែងរកភស្តុតាងបន្ថែមទៀត។

តុលាការបានប្រាប់នៅដើមខែកក្កដានេះថា សំណុំរឿងនេះនឹងឈានដល់ការប្រកាសសាលក្រម មុនខែកញ្ញា។ ស្ថាប័ននេះបានឲ្យដឹងនៅក្នុងសេចក្តីថ្លែងការណ៍មួយថា៖ «តុលាការទាមទារឲ្យមានព័ត៌មានបន្ថែម ក្នុងនោះរួមទាំងភស្តុតាង និងពីបុគ្គលដែលត្រូវបានកោះហៅមកសួរនាំកាលពីពេលមុន»។

គួរបញ្ជាក់ថា សំណុំរឿងប្រឆាំងនឹងលោក សេដ្ឋា នេះ ត្រូវបានចាប់ផ្តើមឡើងបន្ទាប់ពីមានបណ្តឹងរបស់សមាជិកព្រឹទ្ធសភាតែងតាំងដោយពួកយោធាចំនួន ៤០រូប កាលពីខែឧសភា ដែលបន្ទាប់មកតុលាការធម្មនុញ្ញ បានទទួលយក។

សំណុំរឿងនេះ ស្វែងរកការបញ្ចប់តំណែងនាយករដ្ឋមន្ត្រី ពាក់ព័ន្ធនឹងការតែងតាំងមេធាវីមួយរូប គឺលោក Pichit Chuenban ដែលធ្លាប់ជាប់ពន្ធនាគារពីបទមើលងាយតុលាការ ក្នុងជួរគណៈរដ្ឋមន្ត្រី។ បណ្ដឹងនេះចោទថា លោក Pichit ខ្វះស្តង់ដារខាងក្រមសីលធម៌ សម្រាប់តំណែងរដ្ឋមន្ត្រី ដែលមានចែងក្នុងរដ្ឋធម្មនុញ្ញ។ លោក Pichit ចាប់តាំងពីពេលនោះមក បានលាលែង ហើយលោក សេដ្ឋា បដិសេធការប្រព្រឹត្តខុសណាមួយ។

ប្រសិនបើអ្នកនយោបាយថ្មី លោក សេដ្ឋា ត្រូវបានបញ្ចប់តួនាទីពិតមែននោះ រដ្ឋាភិបាលថ្មីត្រូវតែត្រូវបានបង្កើតឡើង ហើយគណបក្សភឿថៃ (Pheu Thai) ដែលកំពុងកាន់អំណាចរបស់លោក នឹងត្រូវដាក់បេក្ខជនថ្មី សម្រាប់តំណែងនាយករដ្ឋមន្ត្រី ដែលត្រូវបានបោះឆ្នោតដោយសភា៕