គណៈកម្មាធិការរៀបចំការបោះឆ្នោតរបស់ប្រទេសថៃ នៅថ្ងៃពុធ (ទី១០ ខែកក្កដា) នេះ បានអនុម័តសមាជិកព្រឹទ្ធសភាថ្មីចំនួន ២០០នាក់ ដែលនឹងជំនួសសភាជាន់ខ្ពស់តែងតាំងដោយយោធា ដោយបង្ហាញស្ថាប័ននីតិប្បញ្ញត្តិថ្មី ដែលអ្នកវិភាគថា អាចបង្កការលំបាកក្នុងការគ្រប់គ្រង សម្រាប់គណបក្សភឿថៃ (Thai party) ដែលកំពុងកាន់អំណាច។

គួរបញ្ជាក់ថា ព្រឹទ្ធសភាថ្មីនេះ នឹងមិនមានតួនាទីក្នុងការបោះឆ្នោត ដើម្បីអនុម័តអ្នកដែលក្លាយជានាយករដ្ឋមន្ត្រីនោះទេ ប៉ុន្តែនឹងបន្តសិទ្ធិអំណាច ក្នុងការត្រួតពិនិត្យវាយតម្លៃច្បាប់ និងតែងតាំងសមាជិកសំខាន់ៗរបស់ស្ថាប័នដ៏មានឥទ្ធិពលនានា ដូចជាគណៈកម្មាធិការរៀបចំការបោះឆ្នោត និងតុលាការធម្មនុញ្ញជាដើម។

អគ្គលេខាធិការនៃគណៈកម្មាធិការរៀបចំការបោះឆ្នោត លោក Sawaeng Boonmee បាននិយាយថា មានការពន្យារពេលក្នុងការប្រកាសលទ្ធផលនៃដំណើរការជ្រើសរើសព្រឹទ្ធសភាដ៏ស្មុគស្មាញ ដែលបានបញ្ចប់ក្នុងខែមិថុនា ដោយសារមានបណ្តឹងមួយចំនួន ដែលឥឡូវនេះ ត្រូវបានពិនិត្យរួចហើយ។

យ៉ាងណាក្ដី ក្រុមអ្នកវិភាគបាននិយាយថា លទ្ធផលបណ្តោះអាសន្ននៃការបោះឆ្នោតព្រឹទ្ធសភា បានបង្ហាញថា សភាជាន់ខ្ពស់ខ្វះសំឡេងសម្ព័ន្ធមិត្តសំខាន់ៗរបស់គណបក្សភឿថៃ ខណៈពេលដែលមានការកើនឡើងនូវសំឡេងរបស់ដៃគូដ៏ធំបំផុតក្នុងរដ្ឋាភិបាលចម្រុះ គឺគណបក្សភូមិចៃថៃ (Bhumjaithai) ដែលអាចដើរតួជាអ្នកតំណាង ក្នុងការបង្កើតក្រុមរាជានិយមរបស់ពួកអភិរក្សនិយម៕