ក្រុមមេដឹកនាំពិភពលោក បានធ្វើដំណើរទៅដល់ទីក្រុងវ៉ាស៊ីងតោនសម្រាប់កិច្ចប្រជុំកំពូលអង្គការណាតូ ស្របពេលដែលអង្គការមួយនេះ ប្រារព្ធខួបលើកទី ៧៥របស់ខ្លួន ក៏ដូចជារកឃើញគោលបំណងថ្មីក្នុងការប្រឆាំងចំពោះការវាយលុកអ៊ុយក្រែនរបស់ប្រធានាធិបតីរុស្ស៊ីលោក Vladimir Putin ។ 

ប្រធានាធិបតីសហរដ្ឋអាមេរិកលោក Joe Bidenបានស្វាគមន៍ក្រុមមេដឹកនាំរដ្ឋជាសមាជិកអង្គការណាតូ នៅកិច្ចប្រជុំកំពូលដែលផ្តោតសំខាន់លើការគាំទ្រអ៊ុយក្រែន ប៉ុន្តែត្រូវបានឃ្លាំមើលយ៉ាងដិតដល់ផងដែរពីសម្ព័ន្ធមិត្ត ទាំងនៅក្នុងស្រុក និងក្រៅស្រុក សម្រាប់ភស្តុតាងដែលប្រធានាធិបតីរូបនេះ អាចនៅដឹកនាំបាន ។ 

លោក Bidenវ័យ ៨១ឆ្នាំ មានពេលវេលាដ៏លំបាករយៈពេល ១២ថ្ងៃនៃការចោទសួរពីសមត្ថភាពរបស់លោកក្នុងការកាន់តំណែង ស្របពេលដែលក្រុមប្រជាធិបតេយ្យមួយចំនួននៅវិមានកាពីតូល និងក្រុមបរិច្ចាគយុទ្ធនាការ ព្រួយបារម្ភថា លោកនឹងចាញ់ការបោះឆ្នោតឆ្នាំ ២០២៤ ក្រោយឈប់ជជែកដេញដោលកាលពីថ្ងៃទី ២៧ ខែមិថុនា ។ 

សេតវិមានសង្ឃឹមថា លោក Bidenនឹងអាចផ្លាស់ប្តូរការព្យាករណ៍ ពេលដែលលោកធ្វើជាម្ចាស់ផ្ទះកិច្ចប្រជុំកំពូលអង្គការណាតូ ។ 

លោក Bidenបានច្រានចោលការអំពាវនាវឲ្យលាឈប់ពីការប្រកួតប្រជែងរបស់លោកជាមួយលោក Donald Trump វ័យ ៧៨ឆ្នាំ មកពីគណបក្សសាធារណរដ្ឋ ដោយលោកប្តេជ្ញាថា នឹងយកឈ្នះគូប្រជែងម្នាក់នេះឲ្យខាងតែបាន ៕