ពោធិ៍សាត់ ៖ ផ្លូវជនបទជាច្រើនខ្សែនៅក្នុងខេត្តពោធិ៍សាត់ ដែលស្ថិតក្រោមក្របខណ្ឌក្រសួងអភិវឌ្ឍន៍ជនបទ ត្រូវបានស្ថាបនា ស្តារ ថែទំា និង ការកែលម្អហេដ្ឋរចនាសម្ព័ន្ធជាបន្តបន្ទាប់ ដើម្បីផ្តល់ប្រយោជនដល់សាធារណជន ជាពិសេសការធ្វើដំណើររបស់ប្រជាពលរដ្ឋនៅ មូលដ្ឋាន ។

​ឯកឧត្តម ទ្រី ម៉េង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ១០ ខែ កក្កដា ឆ្នាំ ២០២៤ នេះ បានដឹកនាំក្រុមការងារអន្តរក្រសួង ចុះត្រួតពិនិត្យវាយតម្លៃ លើការងារកែលម្អផ្លូវក្រាលបេតុងចំនួន ១ ខ្សែ មាន ៣កំណាត់ ប្រវែងសរុប ១ ២០០ ម៉ែត្រ (កំណាត់ទី១ ប្រវែង ៤០០ ម៉ែត្រ កំណាត់ទី២ ប្រវែង ៣០០ ម៉ែត្រ និងកំណាត់ទី៣ ប្រវែង ៥០០ ម៉ែត្រ ទទឹង ៦ ម៉ែត្រ និងសាងសង់លូមូលមុខមួយចំនួន ១ កន្លែង ស្ថិតនៅឃុំត្រពាំងជង ឃុំផ្ទះរុង និងឃុំសំរោង ស្រុកបាកាន ស្រុកតាលោសែនជ័យ និងស្រុកភ្នំក្រវាញ ខេត្តពោធិ៍សាត់ ដែលគម្រោងខាងលើនេះ អនុវត្តដោយ នាយកដ្ឋានស្ថាបនា និងវិស្វកម្ម នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ ។

ជុំវិញគម្រោងផ្លូវខាងលើនេះ, ឯកឧត្តម ទ្រី ម៉េង បានវាយតម្លៃខ្ពស់ ចំពោះការខិតខំប្រឹងប្រែងស្ថាបនាផ្លូវទាំងបីកំណាត់នេះ ឡើង សម្រេចបានតាមផែនការ ព្រោះផ្លូវនៅជនបទនេះមានសារៈសំខាន់ណាស់ និងក៏ជាផ្លូវសេដ្ឋកិច្ចមួយ សម្រាប់ការដឹកជញ្ជូន កសិផល ឬការដឹកទំនិញផ្សេងៗ ជាពិសេសការរកស៊ីទទួលទានប្រចាំថ្ងៃរបស់ប្រជាពលរដ្ឋនៅតាមមូលដ្ឋានជាដើម។

ឯកឧត្តម បញ្ជាក់ថា ជុំវិញការអភិវឌ្ឍន៍ផ្លូវជនបទនេះ ក្រសួងបាននិងកំពុងផ្តោតយកចិត្តទុកដាក់យ៉ាងខ្លាំង ដោយស្ថាបនា គិតគូរពីភាពធន់ និងការប្រែប្រួលអាកាសធាតុ នូវរាល់ការស្ថាបនា ឬការស្តារផ្លូវជនបទគ្រប់ប្រភេទ ដើម្បីធានាសម្រាប់ការប្រើ ប្រាស់យូរអង្វែង ជាក់ស្តែងផ្លូវបេតុងទាំងនេះ នឹងផ្តល់អត្ថប្រយោជន៍ដល់សាធារណជនទូទៅ ជាពិសេសការធ្វើដំណើររបស់ ប្រជាពលរដ្ឋរស់នៅតាមមូលដ្ឋានជាដើម។

សូមបញ្ជាក់ថា បន្ទាប់ពីចុះពិនិត្យគម្រោងខាងលើរួច, ឯកឧត្តម ទ្រី ម៉េង និងក្រុមការងារអន្តរក្រសួង បានចុះជួបសំណេះសំណាល ជាមួយអាជ្ញាធរមូលដ្ឋាន និងប្រជាពលរដ្ឋចំនួន ៥០ គ្រួសារ ដោយក្នុងពិធីនោះ ឯកឧត្តមក៏បានផ្តាំផ្ញើដល់អាជ្ញាធរមូលដ្ឋាន និងប្រជា ពលរដ្ឋរស់នៅតាមផ្លូវនេះ សូមចូលរួមថែទាំផ្លូវ និងលូនៅក្នុងមូលដ្ឋានរបស់ពួកគាត់ ឲ្យបានគង់វង់យូរអង្វែង ព្រោះកាលណាយើង មានផ្លូវល្អ និងជួយសម្រួលការធ្វើដំណើរបានលឿន និងចំណេញពេលវេលាជាដើម។ នៅក្នុងពិធីសំណេះសំណាលនេះដែរ ឯកឧត្តម ក៏បាននាំយកអំណោយដ៏ថ្លៃថ្លា របស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ចែកជូនប្រជាពលរដ្ឋនៅមូលដ្ឋាន ខាងលើ, ដោយក្នុងនោះម្នាក់ៗទទួលបានក្រម៉ាចំនួន ១ ផងដែរ៕