​​អូឡាំពិក៖ ឯកឧត្តម វ៉ា​ត់ ចំរើន អគ្គលេខាធិការ​គណៈកម្មាធិកា​រ​ជាតិ​អូឡាំពិក​កម្ពុជា ​(NOCC) បាន​ធ្វើ​ការ​ចែក​រំលែក​បទពិសោធន៍ ការងារ​កីឡា និង​ជីវិត​តស៊ូ​រហូត​ទទួល​បាន​ជោគជ័យ និង​ក្លាយ​ជា​ថ្នាក់ដឹកនាំ​កីឡា​មួយ​រូប​នៅ​កម្ពុជាដល់​និស្សិត​ជប៉ុន និង​កម្ពុជា​នៅ​ក្នុង​កម្មវិធី Diverse Voyage Phnom Penh Online ដែល​រៀបចំ​ដោយ​អង្គការ Global Incubation X Fostering Talents (GiFT) របស់​ប្រទេស​ជប៉ុន។​

​កម្មវិធី​នេះបានរៀបចំ​តាម​ប្រព័ន្ធ​អន​ឡាញកាលពី​ថ្ងៃទី​២៥ ខែសីហា​ម្សិលមិញ ដើម្បី​ចែក​រំលែក​អំពី “​ចក្ខុវិស័យ បេសកកម្ម និង​គុណ​តម្លៃ​កីឡា​ឆ្ពោះទៅ​ឆ្នាំ​២០២៣” ដោយមាន​និស្សិត​ជប៉ុន និង​កម្ពុជា​ចូលរួម​សរុប​ចំនួន ៣៧​នាក់ក្នុង​គោលបំណង​លើកកម្ពស់ និង​ផ្សព្វផ្សាយ​នូវ​គុណ​តម្លៃ​កីឡា និង​ស្មារតី​អូឡាំពិក ក្រោម​ប្រធានបទ មិត្តភាព សាមគ្គីភាព និង​ភាពយុត្តិធម៌ (Friendship Solidarity and Fairness)។​ ​អ្នកជំនាញ​កីឡា​ដដែលបាន​ចែករំលែក​បទពិសោធន៍​ជាច្រើន តាំងពី​ចាប់ផ្ដើម​អាជីព​ជា​កីឡាកររហូត​ក្លាយ​អត្ត​ព​លិ​ក​អូឡាំពិក និង​ក្លាយជា​ថ្នាក់ដឹក​នាំ​កីឡា​មួយរូប​នាពេល​បច្ចុប្បន្ន។ ស្រប​ជាមួយគ្នា ឯកឧត្តម​ក៏បាន​ផ្សារភ្ជាប់​នូវ​បទពិសោធន៍​ការងារ​ត្រៀម​ស៊ី​ហ្គេមឆ្នាំ​២០២៣ និង​ចែករំលែក​នូវ​ទស្សនៈវិស័យ​កីឡា ដើម្បី​លើកទឹកចិត្ត​ឲ្យ​និស្សិត​ជប៉ុន និង​និស្សិត​ខ្មែរបាន​យល់ដឹង​អំពី​ការផ្សព្វផ្សាយ​ព្រឹត្តិការណ៍ ​ជា​ប្រវត្តិសាស្ដ្រ​នេះ​ផងដែរ។​

​ក្រោយ​ស្ដាប់​នូវ​បទ​បង្ហាញ និង​ចែករំលែក​បទពិសោធន៍​របស់​វាគ្មិន ដែលជា​អ្នកជំនាញ និង​ជា​អតីត​អត្ត​ព​លិ​ក​អូឡាំពិក​កម្ពុជា ក្រុមនិស្សិត​ជប៉ុនក៏ដូចជា​និស្សិត​កម្ពុជាបាន​សម្ដែង​ការសប្បាយ​ចិត្ត និង​ថ្លែងអំណរគុណ​យ៉ាង​ជ្រាលជ្រៅចំពោះ​ដំបូន្មាន​ល្អៗ និង​បទពិសោធន៍​ដ៏​ប្រពៃ​របស់​ឯកឧត្តម វ៉ា​ត់ ចំរើន ហើយ​ពួកគេ​បាន​អះអាងថា នឹង​ចងចាំ​ជានិច្ច ហើយ​ទុកជា​គំរូ​ដ៏​ល្អ​មួយ ក៏ដូចជា​ធ្វើជា​មេរៀន និង​ជា​បទពិសោធន៍​ជីវិត​បន្ថែម​ទៀត​ផង៕

​អត្ថបទ៖ លី ឈុន​ឡា