ភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ បានបញ្ចេញរបាយការណ៍ឲ្យដឹងថា គិតក្នុងឆមាសទី១ ឆ្នាំ២០២៤ កម្ពុជាសម្រេចការនាំចេញកសិកម្មទៅកាន់ទីផ្សារអន្តរជាតិ ចំនួនប្រមាណ ៣,៩លានតោន មានការកើនប្រមាណ ៥៧,២៨% បើធៀបទៅនឹងរយៈពេលដូចគ្នាឆ្នាំ២០២៣ មានចំនួន ៣,៩លានតោន។

​លោកជំទាវ អឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១០ ខែកក្កដានេះ បានមានប្រសាសន៍ឲ្យដឹងថា មុខទំនិញសំខាន់ៗដែលកម្ពុជាធ្វើការនាំចេញទាំងនោះ មានដូចជា៖ ស្រូវ អង្ករ ម្រេច ដំឡូងមី ផ្លែមៀនស្រស់ ស្វាយ ចេក គ្រាប់ស្វាយចន្ទីរ និងកសិករផលជាច្រើនមុខផ្សេងទៀត។ 

លោកជំទាវ បានគូសបញ្ជាក់ថា ជាគោលអាទិភាពរបស់ក្រសួងកសិកម្ម គឺធ្វើយ៉ាងណាឱ្យប្រជាកសិករ «មានហូប មានបាន មានប្រើ មានរហូត» គឺសំដៅដល់ការធ្វើកសិកម្មបម្រើដល់សន្តិសុខស្បៀង ការប្រើប្រាស់ ការបរិភោគនៅក្នុងប្រទេស ដើម្បីឱ្យកសិផលមានគុណភាព មានតម្លៃសមរម្យ ហើយអាចឱ្យប្រជាកសិករទទួលបានចំណូលច្រើនជាងមុន ចំណេញច្រើនជាងមុន ខណៈពេលនេះ ក្រសួងកំពុងសិក្សាថាធ្វើយ៉ាងណាកុំឱ្យការចំណាយថ្លៃដើមកើនឡើងខ្ពស់។ 

លោកជំទាវ អឹម រចនា បានលើកឡើងបន្ថែមថា បើទោះបីជាស្ថិតនៅក្នុងអនុវិស័យណាក៏ដោយ ក្រសួងកសិកម្មនឹងបន្តខិតខំប្រឹងប្រែងជួយប្រជាកសិករ តាមគោលនយោបាយដែលក្រសួងបានរៀបចំដូចជាគោលនយោបាយពង្រាយមន្ត្រីកសិកម្មឃុំ និងគោលនយោបាយសហគមន៍កសិកម្មទំនើប ដែលនឹងជួយបណ្ដុះបណ្ដាលប្រជាកសិករទាក់ទងនឹងបច្ចេកទេសដាំដុះ ដោយផ្សាភ្ជាប់ទៅនឹងបរិស្ថាន រក្សាធនធានធម្មជាតិបានគង់វង្សយូរអង្វែងតទៅទៀត។

សូមបញ្ជាក់ជូនថា ពាក់ព័ន្ធការនាំចេញកសិផលនេះដែរ បើគិតក្នុងរយៈពេល ៥ខែ ឆ្នាំ២០២៤កន្លងទៅ មានការកើនឡើងចំនួនសរុបជាង ២,២លានតោន បើធៀបនឹងរយៈពេលដូចគ្នាឆ្នាំ២០២៣ ដែលកំណើននេះខ្ពស់ជាងមិនធ្លាប់មានក្នុងរយៈពេល ៥ឆ្នាំ ចុងក្រោយនេះ៕

អត្ថបទ ៖ ឈិត បូរ៉ាវី