តុលាការអ៊ីរ៉ាក់បានចេញសាលក្រមកាត់ទោសប្រហារជីវិត ចំពោះភរិយាសពមេដឹកនាំរដ្ឋអ៊ីស្លាម (IS) លោក Abu Bakr al-Baghdadi ពីបទធ្វើការជាមួយក្រុមនេះ និងឃុំខ្លួនស្ត្រីជនជាតិ Yazidi (ក្រុមអ្នកនិយាយភាសាឃឺដ) នៅក្នុងគេហដ្ឋានរបស់ខ្លួន។ នេះបើយោងតាមអង្គចៅក្រមអ៊ីរ៉ាក់ ដែលបាននិយាយឲ្យដឹង នាថ្ងៃពុធ (ទី១០ ខែកក្កដា) នេះ ដោយមិនប្រាប់ពីឈ្មោះស្ត្រីនោះឡើយ។

ក្រុមប្រឹក្សាតុលាការកំពូល នៅអ៊ីរ៉ាក់ បាននិយាយថា ស្ត្រីជនជាតិ Yazidi ត្រូវបានចាប់ពង្រត់ដោយក្រុមរដ្ឋឥស្លាម នៅក្នុងតំបន់ Sinjar ភាគខាងលិចទីក្រុង Nineveh ហើយបន្ទាប់មកបានឃុំឃាំងដោយស្ត្រីរូបនោះ ក្នុងផ្ទះរបស់ខ្លួន នៅទីក្រុង Mosul។ ស្ត្រីរូបនេះត្រូវបានឃុំខ្លួនក្នុងមន្ទីរឃុំឃាំងប្រទេសអ៊ីរ៉ាក់។

ដោយបដិសេធមិនបញ្ចេញមតិយោបល់លើសំណុំរឿងនេះ ខណៈរូបគេមិនមានសិទ្ធិនិយាយទៅកាន់បណ្ដាញសារព័ត៌មាន មន្ត្រីតុលាការម្នាក់ បានប្រាប់សារព័ត៌មាន Reuters ថា៖ «ថ្ងៃនេះ តុលាការព្រហ្មទណ្ឌ បានកាត់ទោសប្រហារជីវិត ចំពោះភរិយារបស់លោក Baghdadi ដោយព្យួរកពីបទប្រព្រឹត្តឧក្រិដ្ឋកម្មប្រឆាំងមនុស្សជាតិ និងអំពើប្រល័យពូជសាសន៍ប្រឆាំងនឹងជនជាតិ Yazidi ហើយនិងពីបទរួមចំណែកក្នុងសកម្មភាពភេរវកម្ម»។

មន្ត្រីរូបនេះបានបន្ថែមថា សេចក្តីសម្រេចនេះត្រូវតែបានការយល់ព្រមពីតុលាការឧទ្ធរណ៍អ៊ីរ៉ាក់ ដើម្បីឲ្យក្លាយជាសេចក្តីសម្រេចចុងក្រោយ និងអាចអនុវត្តបាន៕