នគរបាលអង់គ្លេស នៅថ្ងៃពុធ (ទី១០ ខែកក្កដា) នេះ កំពុងតាមប្រមាញ់បុរសម្នាក់ ដែលគេជឿថា មានអាវុធជាស្នា បន្ទាប់ពីស្ត្រី ៣នាក់ ត្រូវបានសម្លាប់នៅក្នុងលំនៅឋានមួយ ក្បែរទីក្រុងឡុងដ្រ៍។ 

នគរបាលតំបន់ Hertfordshire បាននិយាយថា បុរសម្នាក់ឈ្មោះ Kyle Clifford អាយុ ២៦ឆ្នាំ កំពុងត្រូវបានស្វែងរក ជុំវិញការសង្ស័យពាក់ព័ន្ធនឹងឃាតកម្ម ៣ករណី។ នគរបាលបាននិយាយថា ស្ត្រីទាំង ៣នាក់នោះ ដែលមានទំនាក់ទំនងជាមួយគ្នា ត្រូវបានគេរកឃើញមានរបួសធ្ងន់ធ្ងរ នៅក្នុងលំនៅឋានមួយ ក្នុងទីក្រុង Bushey ភាគពាយព្យទីក្រុងឡុងដ្រ៍ កាលពីល្ងាចថ្ងៃអង្គារ (ទី៩ ខែកក្កដា)។ នគរបាល និងក្រុមសង្គ្រោះ បានព្យាយាមជួយសង្គ្រោះ ប៉ុន្តែពួកគេត្រូវបានគេប្រកាសថា ស្លាប់នៅនឹងកន្លែងហេតុ។

តែយ៉ាងណាក្ដី នគរបាលមិនបាននិយាយថា តើជនសង្ស័យ Clifford ដែលមកពីទីក្រុងឡុងដ្រ៍ មានទំនាក់ទំនងជាមួយស្ត្រីទាំងនោះដែរ ឬអត់នោះទេ។ អគ្គនាយកស៊ើបអង្កេត មកពីតំបន់ Bedfordshire គឺលោកលោក Rob Hall និងអង្គភាពឧក្រិដ្ឋកម្មធំរបស់តំបន់ Hertfordshire បាននិយាយថា ប៉ូលីសកំពុងតាមប្រមាញ់ Clifford ដែលត្រូវបានគេជឿថានៅទីក្រុងឡុងដ៍ ឬតំបន់ Hertfordshire ដែលនៅជិតខាង។

លោក Hall បាននិយាយថា ជនសង្ស័យ Clifford «ប្រហែលជានៅតែមានអាវុធ» ដែលជាស្នានោះ ហើយបានព្រមានសាធារណជនទូទៅកុំឲ្យចូលទៅជិតជននោះ៕