សមាជិកណាតូបានសន្យាគាំទ្រសម្រាប់ "ផ្លូវដែលមិនអាចត្រឡប់វិញបាន" ទៅកាន់សមាជិកភាពនាពេលអនាគតសម្រាប់អ៊ុយក្រែន ក៏ដូចជាជំនួយបន្ថែមទៀត។    

ស្របពេលការកំណត់ពេលវេលាផ្លូវការសម្រាប់ក្រុងគៀវ ក្នុងការចូលរួមជាមួយសម្ព័ន្ធភាពយោធាមួយនេះ មិនត្រូវបានយល់ព្រមនៅក្នុងកិច្ចប្រជុំកំពូលក្នុងទីក្រុងវ៉ាស៊ីនតោនឌីស៊ី សមាជិកទាំង៣២ប្រទេសរបស់សម្ព័ន្ធមិត្តយោធាដឹកនាំដោយសហរដ្ឋអាមេរិកនេះ បាននិយាយថាពួកគេមានការគាំទ្រឥតងាករេ សម្រាប់កិច្ចខិតខំប្រឹងប្រែងសង្រ្គាមរបស់អ៊ុយក្រែន។

អង្គការណាតូ ក៏បានប្រកាសពីការធ្វើសមាហរណកម្មបន្ថែមទៀតជាមួយយោធារបស់អ៊ុយក្រែន ហើយក្រុមសមាជិកទាំងនេះ បានប្តេជ្ញាផ្តល់ជំនួយចំនួន ៤០ ពាន់លានអឺរ៉ូ ស្មើនឹង៤៣,៣ ពាន់លានដុល្លារ នៅឆ្នាំក្រោយ រួមទាំងយន្តហោះចម្បាំង F-16 និងជំនួយការពារដែនអាកាសផងដែរ។  

លោក Jens Stoltenberg អគ្គលេខាធិការរបស់ប្លុកនេះបាននិយាយថា ការគាំទ្រដល់អ៊ុយក្រែនមិនមែនជាសប្បុរសធម៌ទេ តែនោះគឺស្ថិតនៅក្នុងផលប្រយោជន៍សន្តិសុខរបស់យើងផ្ទាល់។

ការលុកលុយដែលនៅតែបន្តនៅអ៊ុយក្រែនគឺជារបៀបវារៈសំខាន់បំផុតនៅក្នុងកិច្ចប្រជុំកំពូលរបស់ណាតូ ហើយសេចក្តីប្រកាសដែលយល់ព្រមដោយសមាជិកទាំងអស់បាននិយាយថា រុស្ស៊ីនៅតែជាការគំរាមកំហែងដ៏សំខាន់បំផុត និងដោយផ្ទាល់ចំពោះសន្តិសុខ។

រដ្ឋមន្ត្រីការបរទេសអាមេរិក លោក Antony Blinken បានបញ្ជាក់ថា យន្តហោះចម្បាំង F-16 ដែលផលិតដោយសហរដ្ឋអាមេរិក កំពុងស្ថិតក្នុងដំណើរការផ្ទេរទៅកាន់អ៊ុយក្រែន ពីប្រទេសដាណឺម៉ាក និងហូឡង់។

នេះនឹងជាលើកទីមួយដែលអ៊ុយក្រែនបានទទួលយន្តហោះទំនើបនេះ ជាអ្វីដែលក្រុង គៀវបានអំពាវនាវជាយូរមកហើយ។ លោក Blinken បានប្រាប់កិច្ចប្រជុំកំពូលថា យន្តហោះចម្បាំងនេះ នឹងត្រូវប្រើប្រាស់ នៅរដូវក្តៅនេះ៕