នគរបាលចក្រភពអង់គ្លេស បាននិយាយកាលពីថ្ងៃពុធ (១០ កក្កដា) ថាបុរសវ័យ ២៦ ឆ្នាំម្នាក់​ត្រូវ​បានឃុំខ្លួន បន្ទាប់ពីប្រពន្ធ និងកូនស្រីពីរនាក់របស់អ្នកអត្ថាធិប្បាយកីឡាប្រណាំងតាមវិទ្យុ BBC ត្រូវបានសម្លាប់ដោយប្រើស្នា នៅក្នុងការវាយប្រហារដែលសង្ស័យថាជា «ការកំណត់​គោលដៅ​»។

បុរសសង្ស័យឈ្មោះ ខាយ ឃ្លីហ្វហ្វត (Kyle Clifford) មកពីក្រុង អែនហ្វៀល (Enfield) ភាគ​ខាង​ជើង​ទីក្រុងឡុងដ៍្រ ត្រូវបានចាប់ខ្លួន​ពាក់ព័ន្ធ​នឹងការស្លាប់​របស់​ស្ត្រីទាំងបី​នាក់​នោះ​នៅ​ក្នុង​ទីក្រុង ប៊ូសស្ហី (Bushey) ភាគខាងជើងទីក្រុងឡុងដ៍្រ កាលពីយប់ថ្ងៃអង្គារ។ ប្រព័ន្ធ​ផ្សព្វ​ផ្សាយ​បាន​និយាយថា ជនរងគ្រោះមានលោកស្រី ខារ៉ុល ហាន់ (Carol Hunt) វ័យ ៦១ ឆ្នាំជាភរិយា​របស់​អ្នក​អត្ថាធិប្បាយកីឡាប្រណាំងនៅវិទ្យុ BBC គឺលោក ចន ហាន់ (John Hunt) និងកូន​ស្រី​ពីរ​នាក់​ឈ្មោះ លូអ៊ីស (Louise) អាយុ ២៥ ឆ្នាំ និង ហាន់ណា (Hannah) អាយុ ២៨ ឆ្នាំ ។

នៅ​ក្នុងសេចក្តីថ្លែងការណ៍មួយកាលពីថ្ងៃពុធ នគរបាលបាននិយាយថា ជនសង្ស័យ ឃ្លីហ្វហ្វត ដែល​ត្រូវបានរកឃើញដោយក្រុមមន្រ្តីនៅក្រុង អែនហ្វៀល «ត្រូវបានគេដឹងថាជាជនបង្កហេតុ» ហើយ​មិនមានជនសង្ស័យបន្ថែមណាម្នាក់កំពុងត្រូវតាមស្វែងរកនោះទេ។ នគរបាលបាននិយាយថា លោក ឃ្លីហ្វហ្វត «កំពុងទទួលបានការព្យាបាលផ្នែកវេជ្ជសាស្រ្ត ហើយ​មាន​របួសជាប់នឹងខ្លួន» ដោយបន្ថែមថាមិនទាន់មានការចាប់ខ្លួនជាផ្លូវការឡើយ។

ប្រមុខ​នគរបាល ចន ស៊ីមសុន (Jon Simpson) បានហៅហេតុការណ៍នោះថាជា «ឧបទ្ទវហេតុ​ដ៏​គួរ​ឱ្យរន្ធត់មួយដែលគេជឿថាពាក់ព័ន្ធនឹងស្នា ប៉ុន្តែអាវុធ​ផ្សេង​ទៀត​ក៏​អាច​ត្រូវ​បាន​គេ​ប្រើ​ប្រាស់​ផង​ដែរ​»។ នៅចក្រភពអង់គ្លេស គេមិនតម្រូវឱ្យមានអាជ្ញាប័ណ្ណដើម្បីទិញ ឬប្រើប្រាស់ស្នានោះទេ ប៉ុន្តែវាខុសច្បាប់ក្នុងការយកតាមខ្លួនទៅទីសាធារណៈដោយគ្មានហេតុផលសមរម្យ៕