សាក្សីដែលបានឃើញហេតុការណ៍បាននិយាយកាលពីថ្ងៃពុធ (១០ កក្កដា) ថា មីស៊ីលរបស់​អ៊ីស្រាអែល​មួយគ្រាប់ បានធ្លាក់ចូលទៅក្នុងតំបន់ជំរំតង់មួយនៅភាគខាងត្បូងហ្កាហ្សា កាលពី​ថ្ងៃ​អង្គារ (០៩ កក្កដា) ខណៈដែលជនភៀសខ្លួនបាន​ប្រមូលផ្តុំ​គ្នា​នៅ​ទីនោះ​ដើម្បី​មើល​ការ​ប្រកួតបាល់ទាត់នៅសាលារៀនមួយ។

យោងតាមក្រុមមន្ត្រីប៉ាឡេស្ទីនបានឱ្យដឹងថា មនុស្សយ៉ាងហោចណាស់ ២៩ នាក់ ដែលភាគ​ច្រើន​ជាស្ត្រី និងកុមារត្រូវបានសម្លាប់នៅក្នុងការវាយប្រហារនេះ ដែលបានកើតឡើង ខណៈ​ពេល​ដែល​អ្នកទស្សនាបានប្រមូលផ្តុំគ្នាក្នុងបរិវេណសាលានៅតំបន់ អាបាសាន (Abassan) ភាគខាង​កើត​នៃ​ក្រុង ខាន់យូនីស (Khan Younis) ដើម្បីចូលរួមមើលការការប្រកួតកីឡានោះ។

ស្ត្រីវ័យ​ក្មេងម្នាក់ដែលមើលឃើញហេតុការណ៍នោះបានប្រាប់សារព័ត៌មានរ៉យទ័រថា «ពួក​យើង​កំពុង​មើល​ការប្រកួតបាល់ទាត់ ហើយស្រាប់តែមានការវាយប្រហារ។ មនុស្សម្នារងរបួស ស្លាប់ ហើយ​សាកសពខ្ចាត់ខ្ចាយសុទ្ធតែឈាម»។

យោធាអ៊ីស្រាអែលបាននិយាយថា ខ្លួនកំពុង​ពិនិត្យ​មើល​របាយការណ៍​ដែល​ថាជ​ន​ស៊ីវិល​ត្រូវ​បាន​រង​គ្រោះ ដោយបន្ថែមថា ឧបទ្ទវហេតុនេះកើតឡើងនៅពេលដែលខ្លួនបានវាយប្រហារដោយ «គ្រាប់​បែកកំណត់គោលដៅជាក់លាក់» លើយុទ្ធជនហាម៉ាស ដែលបានចូល​រួម​ក្នុង​ការ​វាយ​ឆ្មក់​ថ្ងៃ​ទី០៧ ខែតុលាលើអ៊ីស្រាអែល។ យោធាមិនបានឆ្លើយតបភ្លាមៗចំពោះសំណើសុំការអត្ថាធិប្បាយ ថា​តើខ្លួនបានដឹងថាមានការប្រកួតបាល់ទាត់នៅពេលដែលមានការបញ្ជាឱ្យធ្វើការប្រហារនោះ ឬយ៉ាង​ណាទេ៕