ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១១ ខែកក្កដា ឆ្នាំ២០២៤នេះ បាន​អញ្ជើញ​ផ្សព្វ​ផ្សាយ​ស្តីពី “ការអនុវត្តរបបសន្តិសុខ​សង្គម​ផ្នែកថែទាំ​សុខភាព​តាម​របប​ភាគ​ទាន​ដោយ​ស្ម័គ្រ​ចិត្ត​សម្រាប់​អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ” និង “កម្មវិធីបណ្តុះបណ្តាល​ជំនាញ​វិជ្ជាជីវៈ និងបច្ចេកទេស” ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ” នៅ​ខេត្តពោធិ៍សាត់។ ពិធីនេះរៀបចំធ្វើឡើងនៅ សណ្ឋាគារ រីវើសាយ ក្នុងក្រុងពោធិ៍សាត់ ក្រោម អធិបតីភាពឯកឧត្តម ហួត ស៊ីនាដ រដ្ឋលេខាធិការ តំណាងដ៏ ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈ។

ថ្លែងទៅកាន់អង្គពិធី ឯកឧត្តមរដ្ឋលេខាធិការ បាន​គូស​បញ្ជាក់ថា​ការ​ដាក់​ចេញ​នូវ​កម្ម​វិធី​ថ្នាក់​ជាតិ​ស្តីពី​របប​សន្តិសុខសង្គមផ្នែកថែទាំ​សុខភាព​តាមរបប​ភាគ​ទានដោយ​ស្ម័គ្រ​ចិត្ត​សម្រាប់​អ្នក​ក្នុង​បន្ទុកស​មាជិក ប.ស.ស. ជាមន្ត្រីសាធារណៈ និង កម្មវិធីបណ្តុះបណ្តាលជំនាញវិជ្ជាជីវៈ និង​បច្ចេក​ទេស​ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ គឺជាគោល​នយោបាយ​សំខាន់២​ក្នុងចំណោមគោលនយោបាយអាទិភាពទាំង៦ របស់រាជរដ្ឋាភិបាល​ដើម្បី​ជំរុ​ញ​ឱ្យ​ប្រជាពលរដ្ឋ​ទទួលបានការថែទាំសុខភាពកាន់តែប្រសើរ និងមានវិសាល​ភាព​គ្រប​ដណ្តប់​យ៉ាង​ទូលំ​ទូលាយ រួមទាំង​ការ​ផ្តល់ជំ​នាញ​វិជ្ជាជីវៈ​ដល់​ប្រជាពលរដ្ឋ​ក្នុង​គោល​បំណង​បង្កើត​ឱ្យ​ពលរដ្ឋ​មាន​ការងារ​សមរម្យនិងជីវភាពកាន់តែប្រសើរ។

ឯកឧត្តមបានគូសបញ្ជាក់ថា មានតែក្នុងអាណត្តិរាជរដ្ឋាភិបាលដែលដឹកនាំដោយសម្តេចតេជោ ហ៊ុន សែន និងសម្តេចធិបតីប៉ុណ្ណោះដែលការផ្តល់របបសន្តិសុខសង្គមដែលមានទាំង៣របប គឺ​រប​ប​ថែទាំសុខភាព របបហានិភ័យការងារ និងរបប​សោធន​និវត្ត​ត្រូវ​បាន​ផ្តល់​ជូន​ប្រជាពលរដ្ឋ​ទាំង​មន្ត្រី​រាជការ និងពលរដ្ឋក្នុងវិស័យឯកជន។

បន្ថែមពីនេះ ឯកឧត្តម បានលើកឡើងពីអត្ថប្រយោជន៍នៃកម្មវិធីបណ្តុះបណ្តាលជំនាញវិជ្ជាជីវៈ និង​បច្ចេកទេសដល់យុវជនក្រុមគ្រួសារក្រីក្រ និងងាយ​រង​ហានិភ័យ​ដែល​នឹង​ទទួល​បាន​ការ​បណ្តុះ​បណ្តាល​ដោយ​ឥតគិតថ្លៃ និងទទួលបានប្រាក់ឧបត្ថមចំនួន ២៨ម៉ឺនរៀល​ក្នុង​មួយ​ខែ​ជាមួយ​នឹង​ភាព​បត់​បែន​នៃកាលវិភាគសិក្សាដែលមានចំនួនរហូតទៅដល់៧វេន ហើយរាជរដ្ឋាភិបាល​ធានា​ផ្តល់​ការងារ​ធ្វើដែលមានប្រាក់ឈ្នួលសមរម្យ៕