អាហ្វហ្គានីស្ថាន៖ ពលរដ្ឋអាហ្វហ្គានីស្ថាននៅថ្ងៃព្រហស្បតិ៍នេះ បានប្រញាប់ប្រញាល់រត់គេចចេញពីរបបគ្រប់គ្រងរបស់ពួកតាលីបង់ ប៉ុន្តែក្រុមមន្ត្រីប្រទេសលោកខាងលិចបាននិយាយថា ក្រុមរបស់ខ្លួនបានធានាថា ការជម្លៀសមួយចំនួននឹងត្រូវបានអនុញ្ញាត បន្ទាប់ពីផុតកាលកំណត់ដកកងកម្លាំងអាមេរិកនៅសប្ដាហ៍ក្រោយ។
មនុស្សជាង ៨០.០០០នាក់ត្រូវបានគេជម្លៀសចេញចាប់តាំងពីថ្ងៃទី១៤ ខែសីហា ប៉ុន្តែហ្វូងមនុស្សដ៏ច្រើននៅតែស្ថិតនៅខាងក្រៅអាកាសយានដ្ឋានរដ្ឋធានីកាប៊ុល ដោយសង្ឃឹមថានឹងរត់គេចផុតពីការគំរាមកំហែងនៃការសងសឹក និងការគាបសង្កត់នៅក្នុងប្រទេសអាហ្វហ្គានីស្ថានដឹកនាំដោយពួកតាលីបង់។ រដ្ឋមន្ត្រីការបរទេសអាមេរិក លោក Antony Blinken បាននិយាយកាលពីថ្ងៃពុធថា ពួកតាលីបង់បានប្តេជ្ញាអនុញ្ញាតឱ្យមានការចាកចេញ របស់ជនជាតិអាមេរិកដែលមានហានិភ័យ ប្រជាជនអាហ្វហ្កានីស្ថាន និងប្រជាជនមកពីប្រទេសផ្សេងទៀត បន្ទាប់ពីការរារាំងមិនឲ្យជនជាតិអាហ្វហ្គានីស្ថាន ទៅដល់អាកាសយានដ្ឋានកាលពីថ្ងៃអង្គារ។
លោក Blinken បានប្រាប់អ្នកយកព័ត៌មានថា “ពួកគេមានទំនួលខុសត្រូវក្នុងការប្រកាន់ខ្ជាប់នូវការប្តេជ្ញាចិត្តនេះ និងផ្តល់ការឆ្លងកាត់ប្រកបដោយសុវត្ថិភាព សម្រាប់អ្នកដែលចង់ចាកចេញពីប្រទេស”។ លោកបានបន្ថែមថា យ៉ាងហោចណាស់ពលរដ្ឋអាមេរិកចំនួន ៤.៥០០នាក់ក្នុងចំណោម ៦.០០០នាក់ដែលបាននិយាយថា ពួកគេចង់ចាកចេញពីអាហ្វហ្គានីស្ថានបានចាកចេញរួចហើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
