អ៊ីស្រាអែល បាននិយាយកាលពីថ្ងៃពុធ (១០ កក្កដា) ថារថយន្តជញ្ជូនជំនួយមនុស្សធម៌ចំនួន ១.១៥០ គ្រឿងកំពុងរង់ចាំការប្រមូលពីភាគីប៉ាឡេស្ទីនតាមច្រក កេរឹម ស្ហាលូម (Kerem Shalom) ក្នុងតំបន់ហ្កាហ្សាស្ទ្រីប ភាគខាងត្បូង ដោយជំរុញឱ្យអង្គការសហប្រជាជាតិនិយាយថា «យើងកំពុងប្រឹងប្រែងអស់លទ្ធភាពហើយ» ខណៈចោទអ៊ីស្រាអែល ថាបង្កឧបសគ្គដល់ផ្លូវជំនួយ។

ទីភ្នាក់ងារ COGAT របស់ក្រសួងការពារជាតិអ៊ីស្រាអែល មានភារកិច្ចសម្របសម្រួលការដឹកជញ្ជូនជំនួយទៅក្នុងទឹកដីប៉ាឡេស្ទីន បាននិយាយថា រថយន្តជំនួយចំនួន ៥០ គ្រឿងផ្សេងទៀតក៏កំពុងរង់ចាំការប្រមូលពីភាគីប៉ាឡេស្ទីនតាមច្រក អេរ៉េស (Erez) នៅភាគខាងជើងហ្កាហ្សាផងដែរ។

អង្គការសហប្រជាជាតិបាននិយាយថា ខ្លួនកំពុងជួបការលំបាកក្នុងការចែកចាយជំនួយក្នុងតំបន់ហ៊ុមព័ទ្ធមួយនេះ ខណៈដែលសង្រ្គាមរវាងអ៊ីស្រាអែល និងពួកសកម្មប្រយុទ្ធប៉ាឡេស្ទីនហាម៉ាស ឈានចូលដល់ខែទី១០ ហើយច្បាប់ និងសណ្តាប់ធ្នាប់ត្រូវបានបំផ្លាញ។ អ្នកនាំពាក្យអង្គការសហប្រជាជាតិ លោក ស្តេហ្វាន ឌូចារីក (Stephane Dujarric) បាននិយាយថា «ត្រូវហើយ ជំនួយត្រូវបានដឹកមកពិតមែន ប៉ុន្តែនៅខាងហ្កាហ្សា ភាពគ្មានច្បាប់ទាំងស្រុង បូករួមទាំងជម្លោះកំពុងបន្ត បានរារាំងការចែកចាយ»។

អ៊ីស្រាអែល បានរិះគន់ប្រតិបត្តិការជំនួយដែលដឹកនាំដោយអង្គការសហប្រជាជាតិ នៅក្នុងតំបន់ហ៊ុមព័ទ្ធមានប្រជាជន ២,៣ លាននាក់នេះថាគ្មានប្រសិទ្ធភាព ប៉ុន្តែអង្គការនេះនិយាយថា ការចែកចាយមិនត្រឹមតែត្រូវបានរារាំងដោយសង្រ្គាមរយៈពេលជិតប្រាំបួនខែរវាងអ៊ីស្រាអែល និងក្រុមហាម៉ាស ប៉ុណ្ណោះទេ ថែមទាំងដោយសារភាពគ្មានច្បាប់ទៀតផង៕