អាហ្វហ្គានីស្ថាន៖ សហរដ្ឋអាមេរិក និងចក្រភពអង់គ្លេសបានព្រមានពលរដ្ឋរបស់ខ្លួន ឱ្យចាកចេញពីអាកាសយានដ្ឋានទីក្រុងកាប៊ុល និងជៀសវាងការធ្វើដំណើរទៅទីនោះដោយសារតែការគំរាមកំហែងផ្នែកសន្តិសុខ។ ប្រទេសទាំងពីរបានចេញការព្រមានកាលពីល្ងាចថ្ងៃពុធ ខណៈមនុស្សរាប់ពាន់នាក់នៅតែរង់ចាំនៅខាងក្នុង និងខាងក្រៅអាកាសយានដ្ឋានរង់ចាំហោះហើរចេញ។
មនុស្សជាង ៨២.០០០នាក់ត្រូវបានដឹកតាមយន្តហោះពីរដ្ឋធានីកាប៊ុល ដែលបានធ្លាក់ចូលដៃក្រុមតាលីបង់កាលពី ១០ថ្ងៃមុន។ បណ្ដាប្រទេសនានាកំពុងប្រញាប់ប្រញាល់ ជម្លៀសប្រជាជននៅត្រឹមថ្ងៃផុតកំណត់ថ្ងៃទី៣១ ខែសីហា។ ពួកតាលីបង់បានជំទាស់នឹងការពន្យារពេលផុតកំណត់ ប៉ុន្តែក៏បានសន្យាថានឹងអនុញ្ញាតឱ្យជនបរទេស និងជនជាតិអាហ្វហ្គានីស្ថានចាកចេញពីប្រទេសនេះហួសពីថ្ងៃទី៣១ ខែសីហាផងដែរ នេះបើយោងតាមរដ្ឋមន្ត្រីការបរទេសអាមេរិក លោក Antony Blinken។
នៅក្នុងការជូនដំណឹងមួយកាលពីថ្ងៃពុធ ក្រសួងការបរទេសអាមេរិកបានប្រាប់អ្នកដែលរង់ចាំនៅច្រកទ្វារ Abbey, ច្រក East Gate ឬច្រក North Gate នៃអាកាសយានដ្ឋានថា “ឆាប់ចាកចេញភ្លាមៗ”។ មុននេះចក្រភពអង់គ្លេសបានចេញសេចក្ដីណែនាំប្រហាក់ប្រហែលគ្នា ដោយសុំឱ្យប្រជាជននៅទីនោះ “ផ្លាស់ទីទៅកន្លែងមានសុវត្ថិភាព ហើយរង់ចាំការជូនដំណឹងបន្ថែម”។ ការិយាល័យការបរទេសបាននិយាយថា ស្ថានភាពសន្តិសុខនៅអាហ្វហ្គានីស្ថាននៅតែមានការប្រែប្រួល ដោយបន្ថែមថាមានការគំរាមកំហែងជាបន្តបន្ទាប់ និងកម្រិតខ្ពស់នៃការវាយប្រហារភេរវកម្ម៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
