យោងតាមមូលនិធិរោគប្រកាំងរបស់សហរដ្ឋអាមេរិក (AMF) បានឱ្យដឹងថា ដោយសាររលកកម្ដៅកាន់តែញឹកញាប់ និងយូរជាងមុនព្រោះតែបម្រែបម្រួលអាកាសធាតុ ជនជាតិអាមេរិកប្រមាណ ៣៩ លាននាក់បច្ចុប្បន្នកំពុងរស់នៅជាមួយជំងឺប្រកាំង (ឈឺក្បាលខ្លាំង)។ ពាក់កណ្តាលនៃអ្នកដែលមានជំងឺនេះបានរាយការណ៍ថា អាកាសធាតុជាមូលហេតុមួយនៃការឈឺក្បាលរបស់ពួកគេ នេះបើយោងតាមលោកស្រី អេលីហ្សាបេត ឡូឌឺ (Elizabeth Loder) ប្រធានផ្នែករោគឈឺក្បាលនៃមន្ទីរពេទ្យ ប្រ៊ីងហាម (Brigham)។

សារព័ត៌មាន វ៉ាស៊ីនតោនប៉ុស្ដិ៍ (Washington Post) បានរាយការណ៍អំពីការរកឃើញនេះកាលពីថ្ងៃពុធ (១០ កក្កដា) ថា «អ្នកជំនាញបានយល់ស្របថាកម្ដៅអាចជាកត្តាចម្បងមួយ ទោះបីជាការចាប់ផ្តើមនៃការឈឺក្បាលជាញឹកញាប់មានលាយឡំនៃកត្តាបរិស្ថានក៏ដោយ»។

សីតុណ្ហភាពខ្ពស់ជាញឹកញាប់ កើតឡើងអមដោយការផ្លាស់ប្តូរសម្ពាធបរិយាកាស ការប៉ះផ្ទាល់នឹងពន្លឺព្រះអាទិត្យ និងសំណើម ហើយការផ្លាស់ប្តូរបរិយាកាសទាំងនេះអាចបង្កឱ្យមានការឈឺក្បាលខ្លាំងសម្រាប់អ្នកដែលមានជំងឺប្រកាំង។

អ្នកជំនាញមិនប្រាកដអំពីយន្តការច្បាស់លាស់ដែលថាកម្ដៅអាចបង្កឱ្យមានការឈឺក្បាលទេ ប៉ុន្តែជាធម្មតាកម្ដៅខ្លាំងអាចនាំឱ្យមានដំណើរការមួយដែលគេស្គាល់ថាធ្វើឱ្យមនុស្សឈឺក្បាល។ ក្នុងករណីធ្ងន់ធ្ងរ កម្ដៅអាចប៉ះពាល់ដល់មុខងារនៃសរសៃប្រសាទខួរក្បាល នេះបើយោងតាមអ្នកជំនាញផ្នែកសរសៃប្រសាទ ដោយបញ្ជាក់ថាមុខងារកោសិកាដែលផ្លាស់ប្តូរ នាំទៅរកការកើនឡើងនៃសកម្មភាពនៅក្នុងមណ្ឌលឈឺចាប់របស់ខួរក្បាល៕