រដ្ឋមន្ត្រីការពារជាតិអ៊ីស្រាអែល លោក យ៉ូអាវ ហ្គាឡែនធ៍ (Yoav Gallant) បាននិយាយកាលពីថ្ងៃពុធថា អ៊ីស្រាអែល មានឆន្ទៈចង់ឃើញច្រកឆ្លងកាត់រ៉ាហ្វា( Rafah) បើកឡើងវិញ ប៉ុន្តែនឹងមិនអត់ឱនចំពោះការវិលត្រឡប់របស់ពួកហាម៉ាស ទៅកាន់តំបន់នេះទេ។

លោក ហ្គាឡែនធ៍ បានធ្វើការអត្ថាធិប្បាយក្នុងអំឡុងពេលកិច្ចប្រជុំមួយ ក្នុងទីក្រុងហ្ស៊េរុយសាឡឹម ជាមួយអ្នកសម្របសម្រួលសេតវិមានប្រចាំតំបន់មជ្ឈិមបូព៌ា និងអាហ្វ្រិកខាងជើង លោក ប្រិត មិកហ្គាក(Brett McGurk)។នេះបើយោងតាមសេចក្តីថ្លែងការណ៍ដែលចេញផ្សាយដោយក្រសួងការពារជាតិអ៊ីស្រាអែល។

ក្រសួង បាននិយាយថា លោក ហ្គាឡែនធ៍ និងលោក មិកហ្គាក បានពិភាក្សាអំពី«សារៈសំខាន់នៃការចាប់យកឱកាសដែលបានបង្កើតឡើង ដើម្បីសម្រេចបាននូវកិច្ចព្រមព្រៀងមួយសម្រាប់ការវិលត្រឡប់នៃចំណាប់ថ្នូរដែលក្រុមហាម៉ាសបានចាប់នៅតំបន់ហ្កាហ្សា»។

លោករដ្ឋមន្ត្រី បានបញ្ជាក់ថា អ៊ីស្រាអែល មិនច្រានចោលការដកកងកម្លាំងការពារអ៊ីស្រាអែល(IDF) ចេញពីតំបន់រវាងតំបន់ហ្កាហ្សា និងអេហ្ស៊ីប ដែលជាផ្នែកនៃកិច្ចព្រមព្រៀងដោះលែងចំណាប់ថ្នូរ ដែលត្រូវបានចាប់នៅតំបន់ហ្កាហ្សាស្ទ្រីបនោះទេ។