ភ្នំពេញ៖ លោកឧត្តមសេនីយ៍ទោ ស សំបូរធន មេបញ្ជាការរង និងជានាយសេនាធិការកងរាជអាវុធហត្ថលើផ្ទៃប្រទេស នៅថ្ងៃទី១១ ខែកក្កដា ឆ្នាំ២០២៤ បានអញ្ជើញចុះត្រួតពិនិត្យការហ្វឹកហាត់សាកល្បងឈរផែនរបស់កម្លាំងកងរាជអាវុធហត្ថ ដើម្បីត្រៀមចូលរួមអបអរសាទរខួបលើកទី៣១ នៃថ្ងៃបង្កើតឡើងវិញកងរាជអាវុធហត្ថ។

នៅសល់០៤ថ្ងៃទៀតមីទ្ទិញអបអរសាទរខួបអនុស្សាវរីយ៍លើកទី៣១ ទិវាបង្កើតកងរាជអាវុធហត្ថ (១៤ កក្កដា ១៩៩៣-១៤ កក្កដា ២០២៤) ​និងពិធីបញ្ចុះបឋមសិលាបើកការដ្ឋានសាងសង់​សាល​មហោស្រព«គោកធ្លក» ប្រារព្ធឡើងនៅវិទ្យាស្ថានកងរាជអាវុធហត្ថកំបូល ​ស្ថិតក្នុងភូមិសាស្ត្រ ភូមិគល់ សង្កាត់កន្ទោក ខណ្ឌកំបូល រាជធានីភ្នំពេញ។

ពិធីនេះនឹងប្រព្រឹត្តិទៅ​ក្រោមអធិបតីភាព​ឯកឧត្តម នាយឧត្តមសេនីយ៍ ទៀ សីហា​ ឧបនាយករដ្ឋមន្ត្រី រដ្ឋមន្ត្រីក្រសួង​ការពារជាតិ និងជាតំណាងដ៏ខ្ពង់ខ្ពស់​សម្តេច​មហាបវរធិបតី​ ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងមានការអញ្ជើញ​ចូលរួម​ពី​សំណាក់ថ្នាក់​ដឹកនាំ​ជាន់​ខ្ពស់​រាជរដ្ឋាភិបាល ​ក្រសួងការពារជាតិ​ ក្រសួងមហាផ្ទៃ ​អគ្គបញ្ជាការដ្ឋាន​នៃកងយោធពល​ខេមរភូមិន្ទ អគ្គស្នងការដ្ឋាននគរបាលជាតិ សេនានុព័ន្ធ អនុព័ន្ធយោធាបរទេសប្រចាំនៅកម្ពុជា​ភ្ញៀវកិត្តិយសជាតិ​ និងអន្តរជាតិផងដែរ​៕