ក្រសួងការបរទេសចិន នៅថ្ងៃព្រហស្បតិ៍ (ទី១១ ខែកក្កដា) នេះ បាននិយាយថា ប្រទេសរបស់ខ្លួនបានតវ៉ាជាផ្លូវការ ជុំវិញសកម្មភាព «ខុសច្បាប់ និងមិនសមរម្យ» របស់នាវាជប៉ុន ដែលបានចូលដែនទឹករបស់ប្រទេសចិន ហើយបានស្នើឲ្យប្រទេសជប៉ុនសន្យាថា រឿងនេះនឹងមិនកើតឡើងម្តងទៀតជាដាច់ខាត។

ដោយនិយាយនៅឯសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងការបរទេសចិន លោក Lin Jian ក៏បានស្នើឲ្យទីក្រុងតូក្យូ «សន្យា» ថា រឿងនេះនឹងមិនកើតឡើងម្តងទៀតឡើយ។

ដោយដកស្រង់ប្រភពការទូត ទីភ្នាក់ងារសារព័ត៌មាន Kyodo កាលពីថ្ងៃពុធ (ទី១០ ខែកក្កដា) បានរាយការណ៍ថា នាវាពិឃាត Suzutsuki របស់កងកម្លាំងស្វ័យការពារដែនសមុទ្រជប៉ុន បានធ្វើដំណើរចូលទៅក្នុងដែនទឹកនៃខេត្ត Zhejiang របស់ចិន កាលពីថ្ងៃព្រហស្បតិ៍ (ទី៤ ខែកក្កដា) សប្តាហ៍មុន ដែលប្រទេសចិនបាននិយាយថា ខ្លួននឹងធ្វើសមយុទ្ធកងទ័ពជើងទឹក។

លោក Lin Jian បាននិយាយថា ភាគីជប៉ុនបានពន្យល់ថា វាជាកំហុសបច្ចេកទេស ប៉ុន្តែលោកបានបន្ថែមថា ចិនបានទាមទារឲ្យជប៉ុន «ស៊ើបអង្កេតឲ្យបានហ្មត់ចត់ចំពោះឧប្បត្តិហេតុនេះ»។

ទីភ្នាក់ងារសារព័ត៌មាន Kyodo បានឲ្យដឹងបន្ថែមថា ក្រសួងការពារជាតិជប៉ុន បានចាប់ផ្តើមការស៊ើបអង្កេត ដោយសាកសួរកាពីទែនរបស់នាវា Suzutsuki ហើយគោលបំណងរបស់នាវិក មិនទាន់ដឹងច្បាស់នៅឡើយទេ៕