សកម្មជនបរិស្ថានរាប់រយនាក់ បាននាំគ្នាតវ៉ានៅខាងក្រៅតុលាការធម្មនុញ្ញរបស់ប្រទេសស៊ែប៊ី នៅថ្ងៃព្រហស្បតិ៍ (ទី១១ ខែកក្កដា) នេះ ដោយទាមទារដឹងថា តើតុលាការនឹងពិនិត្យមើលបណ្តឹងឧទ្ធរណ៍លើអាជ្ញាប័ណ្ណ សម្រាប់គម្រោងជីករ៉ែលីចូមរបស់ក្រុមហ៊ុន Rio Tinto នៅក្នុងប្រទេសបាល់កង់មួយនេះ ដែលរដ្ឋាភិបាលបានដកហូតនៅឆ្នាំ២០២២ ដែរឬទេ។

មន្ត្រីពីតុលាការធម្មនុញ្ញ មិនបានឆ្លើយតបឡើយទៅនឹងការសាកសួរម្តងហើយម្តងទៀតពីសារព័ត៌មាន Reuters អំពីថា តើតុលាការនឹងមានសម័យប្រជុំ នៅថ្ងៃព្រហស្បតិ៍នេះ ដែរ ឬទេ ហើយប្រសិនបើដូច្នេះ តើនឹងមានរបៀបវារៈអ្វីខ្លះ?

មេដឹកនាំតវ៉ា លោក Zlatko Kokanovic បាននិយាយថា ក្រុមអ្នកតវ៉ាកំពុងអំពាវនាវឲ្យមន្ត្រីតុលាការជួបជាមួយពួកគេ និងប្រគល់ឯកសារទាក់ទងនឹងផែនការរបស់ក្រុមហ៊ុន Rio Tinto សម្រាប់គម្រោង «Jadar» ដើម្បីជីកយករ៉ែ និងដំណើរការកែច្នៃលីចូម នៅជិតទីក្រុង Loznica ភាគខាងលិចស៊ែប៊ី ដែលត្រូវបានលុបចោលដោយរដ្ឋាភិបាល បន្ទាប់ពីមានការតវ៉ា ជុំវិញផលប៉ះពាល់ដល់បរិស្ថានរបស់អណ្ដូងរ៉ែ។

គួរបញ្ជាក់ថា ប្រធានាធិបតីស៊ែប៊ី លោក Aleksandar Vucic បានប្រាប់សារព័ត៌មាន Financial Times កាលពីខែមុន ពី «ការធានាថ្មី» របស់ក្រុមហ៊ុន Rio Tinto ហើយសហភាពអឺរ៉ុប បានសម្លឹងមើលទៅលើការដោះស្រាយកង្វល់របស់ស៊ែប៊ី ជុំវិញថា តើស្តង់ដារបរិស្ថានចាំបាច់ នឹងត្រូវបានបំពេញនៅទីកន្លែងនេះ នៅភាគខាងលិចរបស់ប្រទេស។

ប្រសិនបើត្រូវបានបញ្ចប់សព្វគ្រប់ គម្រោងនេះអាចផ្គត់ផ្គង់បាន ៩០ភាគរយនៃតម្រូវការលីចូមបច្ចុប្បន្នរបស់អឺរ៉ុប ដែលប្រើប្រាស់ក្នុងអាគុយ សម្រាប់រថយន្តអគ្គិសនី និងឧបករណ៍ចល័តនានា៕