ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១១ ខែកក្កដា ឆ្នាំ២០២៤នេះ បានចុះហត្ថលេខាលើអនុស្សរណៈ នៃការយោគយល់ (MoU) ជាមួយសហគ្រិនខ្មែរ ដែលជាស្ថាប័នបង្កើតឡើងក្រោមគំនិតផ្តួចផ្តើមរបស់រាជរដ្ឋាភិបាល ក្នុងគោលបំណងជំរុញការអភិវឌ្ឍប្រព័ន្ធអេកូឡូស៊ីសហគ្រិនភាពឲ្យរស់រវើកនៅកម្ពុជា។

ពិធីនេះ ត្រូវបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាល នៃសហគ្រិនខ្មែរ។

កិច្ចសហការនេះមានគោលបំណងជំរុញកំណើន និងទំនើបកម្មនៃសហគមន៍កសិកម្ម តាមរយៈគម្រោង “សហគមន៍កសិកម្មទំនើប”។ គម្រោងនេះ មានគោលបំណងប្រែក្លាយវិស័យកសិកម្មកម្ពុជាពីលក្ខណៈគ្រួសារ ឲ្យទៅជាសហគ្រាសសេដ្ឋកិច្ចកសិកម្មដ៏រឹងមាំដែលមានសម្មាហរណកម្មខ្ពស់ មានសេដ្ឋកិច្ចមាត្រដ្ឋាន (Economies of Scale) និងមានសមត្ថភាពប្រកួតប្រជែងទាំងគុណភាព និងបរិមាណ។ លក្ខណៈពិសេសរបស់សហគមន៍កសិកម្មទំនើប តម្រូវឲ្យមានការចូលរួមយ៉ាងសកម្មពីកសិករជាសមាជិកក្នុងផលិតកម្មកសិកម្ម និងការគ្រប់គ្រងរួមគ្នាប្រកបដោយប្រសិទ្ធភាព។ វិធីសាស្ត្រសហការរួមគ្នានេះមានគោលបំណងលើកកម្ពស់ការប្រកួតប្រជែងទីផ្សារគ្រប់ចំណុច រួមទាំងគុណភាព បរិមាណ តម្លៃ និងនិរន្តរភាពនៃការផ្គត់ផ្គង់ ពោលគឺ ទិញរួម ផលិតរួម លក់រួម និងគ្រប់គ្រងរួមដោយសហគមន៍។ បន្ទាប់មក ប្រាក់ចំណេញនឹងត្រូវបានបែងចែកទៅតាមសមាមាត្រនៃភាគហ៊ុនរបស់សមាជិក។ ជាផ្នែកមួយនៃកិច្ចសហការនេះ ក្រសួងកសិកម្ម រុក្ខាប្រមាញ់ និងនេសាទ នឹងផ្តោតលើការផ្តល់ការគាំទ្រមួយចំនួនដូចជា បច្ចេកទេសក្នុងការដាំដុះ ធាតុចូលកសិកម្ម គ្រឿង ចក្រ និងហេដ្ឋារចនាសម្ព័ន្ធ។ ទន្ទឹមនឹងនោះ សហគ្រិនខ្មែរ នឹងផ្តោតលើការពង្រឹងជំនាញអាជីវកម្មរបស់សហ គមន៍កសិកម្ម តាមរយៈកម្មវិធីកសាងសមត្ថភាពនានា។

ឯកឧត្តម ឌិត ទីណា បានលើកឡើងថា “កិច្ចសហការរវាងក្រសួងកសិកម្ម រុក្ខាប្រមាញ់ និងនេសាទ និង សហគ្រិនខ្មែរ នៅក្នុងថ្ងៃនេះ នឹងជួយពង្រឹងកម្មវិធីគោលនយោបាយអាទិភាព “សហគមន៍កសិកម្មទំនើប” លើផ្នែកសហគ្រិនភាពនិងការគ្រប់គ្រង។ តាមរយៈជំនាញនិងបទពិសោធរបស់សហគ្រិនខ្មែរ ឯកឧត្តមសង្ឃឹមថា សហគមន៍កសិកម្មទំនើប នឹងអាចសម្រេចបាននូវគោលបំណងបង្កើនភាពប្រកួតប្រជែងនៃកសិកម្មកម្ពុជា តាមរយៈការចងក្រង និងប្រមូលផ្តុំការធ្វើផលិតកម្មរួមគ្នាប្រកបដោយប្រសិទ្ធភាពសេដ្ឋកិច្ចខ្ពស់។

ឯកឧត្តម ហែម វណ្ណឌី បានលើកឡើងថា “ការចុះហត្ថលេខានេះបានបង្ហាញពីការប្តេជ្ញាចិត្តរបស់រាជរ ដ្ឋាភិបាលក្នុងការធ្វើទំនើបកម្ម ក្នុងវិស័យកសិឧស្សាហកម្ម និងអភិវឌ្ឍជំនាញអាជីវកម្ម ដើម្បីលើកស្ទួយប្រព័ន្ធអេកូឡូស៊ីកសិឧស្សាហកម្មរបស់សហគមន៍កសិកម្មឱ្យមានប្រសិទ្ធភាពជាងមុន។

ក្រសួងកសិកម្ម រុក្ខាប្រមាញ់ និងនេសាទ និងសហគ្រិនខ្មែរ នឹងបង្កើតក្រុមការងារកម្រិតជំនាញបច្ចេកទេស ដើម្បីរៀបចំផែនការសកម្មភាព បង្កើតយន្តការវាយតម្លៃរួម ធ្វើបច្ចុប្បន្នភាព និងពិភាក្សាផ្តល់យោបល់ក្នុងន័យ ធានាដល់ការអនុវត្តគម្រោងប្រកបដោយប្រសិទ្ធភាពខ្ពស់៕