យោធាអ៊ីស្រាអែលបានចេញផ្សាយកាលពីថ្ងៃព្រហស្បតិ៍ (១១ កក្កដា) ពីការរកឃើញលើកដំបូងនៃការស៊ើបអង្កេតទៅលើការបរាជ័យផ្នែកសន្តិសុខរបស់ខ្លួនក្នុងអំឡុងពេលការវាយប្រហាររបស់ពួកហាម៉ាសកាលពីថ្ងៃទី០៧ ខែតុលា ដោយទទួលស្គាល់ថាខ្លួនមិនបានការពារពលរដ្ឋនៃសហគមន៍ដែលរងគ្រោះខ្លាំងបំផុតមួយគឺសហគមន៍ គីបប៊ុតស៍ បេអេរី (Kibbutz Be'eri)។

មនុស្សជាង ១០០ នាក់ត្រូវបានសម្លាប់នៅក្នុងការវាយប្រហារលើតំបន់ បេអេរី ដែលជាសហគមន៍មានមនុស្សប្រហែល ១.០០០ នាក់រស់នៅ ហើយមនុស្ស ៣២ នាក់ត្រូវបានចាប់ធ្វើជាចំណាប់ខ្មាំងទៅកាន់តំបន់ហ្កាហ្សា ដែលក្នុងនោះមនុស្ស ១១ នាក់នៅតែជាប់ឃុំនៅហ្កាហ្សា។ យោធាបាននិយាយថា ការស៊ើបអង្កេតបានពិនិត្យលើដំណើរការនៃព្រឹត្តិការណ៍ក្នុងថ្ងៃកើតហេតុការណ៍នោះ ទៅលើការប្រយុទ្ធ និងការប្រព្រឹត្តរបស់កងកម្លាំងសន្តិសុខ។

ខណៈពេលដែលទទួលស្គាល់ការបរាជ័យរបស់ខ្លួនក្នុងការការពារជនស៊ីវិល គីបប៊ុតស៍ យោធាបានសាទរចំពោះភាពក្លាហានរបស់អ្នកស្រុកសហគមន៍ បេអេរី រួមទាំងក្រុមឆ្លើយតបយ៉ាងឆាប់រហ័សរបស់ខ្លួន ដែលទោះបីជាមានគ្នាតិចក៏ដោយ ក៏ព្យាយាមវាយបកលើពួកសកម្មប្រយុទ្ធដែលបានចូលលុកលុយ។

ការស៊ើបអង្កេតបានរកឃើញថា យោធាអ៊ីស្រាអែលមិនបានត្រៀមខ្លួនសម្រាប់សេណារីយ៉ូនៃការជ្រៀតចូលដ៏ធំនៃពួកសកម្មប្រយុទ្ធចូលទៅក្នុងអ៊ីស្រាអែលទេ ហើយខ្លួនមានកម្លាំងមនុស្សមិនគ្រប់គ្រាន់នៅក្នុងតំបន់នោះ រួមទាំងមិនបានដឹងជាមុននៃការវាយប្រហាររហូតដល់ថ្ងៃត្រង់ ប៉ុន្មានម៉ោងបន្ទាប់ពីការវាយប្រហារបានចាប់ផ្តើមរួចទៅហើយ និងមិនបានជូនដំណឹងឱ្យបានត្រឹមត្រូវដល់អ្នកស្រុក ហើយការប្រយុទ្ធរបស់ខ្លួនមិនមានការសម្របសម្រួល ដែលនោះជាការបរាជ័យផ្នែកសន្តិសុខដ៏ធំ៕