៦ខែដើមឆ្នាំ២០២៤ ផលិតផលភាពយន្តកម្ពុជា បាននាំចេញទៅចាក់បញ្ចាំងនៅបរទេស ទទួល​បាន​ជោគជ័យ និងលទ្ធផលល្អប្រសើរ។ នេះបើតាមការបញ្ជាក់របស់លោក ប៉ុក បូរក្ស ប្រធាន​នាយកដ្ឋាន​សិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ ថ្លែងប្រាប់​BTV ព័ត៌មាន នាព្រឹកថ្ងៃទី១២ ខែកក្កដា ឆ្នាំ២០២៤នេះ។

លោក បន្តថា ស្ថានភាពបច្ចុប្បន្ន លើវិស័យឧស្សាហកម្មភាពយន្ត ក្នុងរយៈពេល៦​ខែ​ដើម​ឆ្នាំ​២០២៤ ផលិតផលភាពយន្ត ដែលផលិតឡើងដោយផលិតករ បានចាក់បញ្ចាំង​នៅ​តាម​រោង​ភាពយន្ត​ មានចំនួន២០ចំណងជើង ដែលបានផលិតឡើង ក្នុងឆ្នាំ២០២៤នេះ។ ហើយអ្វីដែលយើងចាប់អារម្មណ៍ឃើញមានភាពយន្តកម្ពុជាមួយចំនួនក្រៅពីការចាក់បញ្ចាំងនៅក្នុងស្រុក ក៏បាននាំចេញទៅចាក់បញ្ចាំងនៅបរទេស ក្នុងឆ្នាំ២០២៤។ នេះជារបត់ថ្មីមួយ ដែលភាព​យន្ត​របស់​យើងបានឈានជើងទៅកាន់ទីផ្សារក្រៅប្រទេសទទួលបានជោគជ័យ និងលទ្ធផល​ល្អ​ប្រសើរ​។

លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បញ្ជាក់ទៀតថា ឧស្សាហកម្ម​ភាពយន្តដែលផលិតករ ខិតខំផលិតឡើងនេះ គឺជាការវិវត្តន៍ថ្មីមួយ ដែលកម្រិតគុណ​ភាព​ស្នាដៃរ​បស់ផលិតករយើង អាចឈានជើងចូលក្នុងទីផ្សារក្រៅប្រទេស ហើយក៏ទទួល​បាន​ការ​គាំទ្រ​ផង​ដែរ។ ជាមួយគ្នានេះ នាយកដ្ឋាន ក៏បានផ្តល់ការអនុញ្ញាត ដូចជា៖ ការផលិតភាពយន្ត ភាព​យន្តឯកសារ កម្មវិធីទូរទស្សន៍នានា ពីបរទេស ដែលមកប្រើប្រាស់ទឹកដីកម្ពុជា ជាកន្លែង​ថត​ភាព​យន្ត​បរទេសផងដែរ៕ អត្ថបទ រដ្ឋា