រដ្ឋបាលរបស់លោកប្រធានាធិបតី Joe Biden បាននិយាយកាលពីថ្ងៃព្រហស្បតិ៍ ទី១១ ខែកក្កដា ថា កំពង់ផែដឹកជញ្ជូនជំនួយមនុស្សធម៌របស់យោធាសហរដ្ឋអាមេរិក នៅឆ្នេរសមុទ្រតំបន់ហ្កាហ្សា ដែលត្រូវបានរារាំងដោយអាកាសធាតុមិនអំណោយផល និងបញ្ហាចែកចាយជំនួយ នឹងបិទក្នុងពេលឆាប់ៗនេះ។

លោក Biden បានប្រកាសកាលពីខែមីនាថា មានផែនការដាក់កំពង់ផែសម្រាប់ការដឹកជញ្ជូនជំនួយ ខណៈគ្រោះទុរ្ភិក្ស កើតឡើងនៅក្នុងតំបន់ហ្កាហ្សា ជាតំបន់មួយមានប្រជាជនចំនួន ២,៣ លាននាក់។

ខណៈកំពង់ផែ បាននាំយកជំនួយចំនួន ៨.១០០តោន ទៅកាន់តំបន់ឆ្នេរហ្កាហ្សា ចាប់តាំងពីកំពង់ផែ បានចាប់ផ្តើមដំណើរការនៅក្នុងខែឧសភា កំពង់ផែបណ្តែតទឹកមានប្រវែង៣៧០ម៉ែត្រនេះ ត្រូវបានរើចេញជាច្រើនលើក ដោយសារតែអាកាសធាតុមិនអំណោយផល។

ជំនួយភាគច្រើន ពុំបានទៅដល់ពលរដ្ឋហ្កាហ្សាដែលស្រេកឃ្លាននោះទេ បន្ទាប់ពីកម្មវិធីស្បៀងអាហារពិភពលោករបស់អង្គការសហប្រជាជាតិ បានផ្អាកប្រតិបត្តិការកាលពីខែមិថុនា ដោយសារការព្រួយបារម្ភពីបញ្ហាសន្តិសុខ។

អ្នកនាំពាក្យរបស់មន្ទីរបញ្ចកោណ ឧត្តមសេនីយ Patrick Ryder បាននិយាយថា យោធាបានព្យាយាមដោយមិនទទួលបានជោគជ័យ ក្នុងការបោះយុថ្កាកំពង់ផែឡើងវិញ កាលពីថ្ងៃពុធ។

ពុំមានកាលបរិច្ឆេទថ្មីសម្រាប់ការបោះយុថ្កាឡើងវិញនោះទេ ប៉ុន្តែកិច្ចខិតខំប្រឹងប្រែងនឹងបញ្ចប់ក្នុងពេលឆាប់ៗនេះ។ លោក Ryder និយាយថា កំពង់ផែតែងតែជាមធ្យោបាយដោះស្រាយបណ្តោះអាសន្ន ដើម្បីផ្តល់លទ្ធភាពលំហូរជំនួយបន្ថែមចូលទៅកាន់តំបន់ហ្កាហ្សា ក្នុងអំឡុងពេលនៃតម្រូវការមនុស្សធម៌ខ្លាំង ខណៈ កំពង់ផែនេះនឹងឈប់ដំណើរការក្នុងពេលឆាប់ៗនេះ។