មន្ត្រីជាន់ខ្ពស់បាននិយាយនៅថ្ងៃសុក្រ ទី១២ ខែកក្កដា នេះថា នគរបាលប្រទេសអូស្ត្រាលី បានចោទប្រកាន់ប្តីប្រពន្ធមួយគូ ពីបទធ្វើចារកម្មឲ្យប្រទេសរុស្ស៊ី ដោយចោទប្រកាន់ពួកគេថា បានចូលទៅប្រើប្រាស់ឯកសារពាក់ព័ន្ធវិស័យការពារជាតិទៅឲ្យទីក្រុងមូស្គូ។

ស្នងការនគរបាលសហព័ន្ធ លោក Reece Kershaw បាននិយាយក្នុងសន្និសីទសារព័ត៌មានថា ស្ត្រីអាយុ៤០ឆ្នាំ និងស្វាមីរបស់នាងអាយុ៦១ ឆ្នាំ ដែលអ្នកទាំងពីរនេះ កាន់លិខិតឆ្លងដែនរុស្ស៊ី ត្រូវបានចោទប្រកាន់ពីបទ «រៀបចំសម្រាប់បទល្មើសចារកម្ម»។

បទចោទប្រកាន់នេះ មានទោសជាប់ពន្ធនាគារអតិបរមា១៥ឆ្នាំ។ ប្តីប្រពន្ធ ដែលបានរស់នៅក្នុងប្រទេសអូស្ត្រាលីអស់រយៈពេលជាង១០ឆ្នាំ និងទទួលបានសញ្ជាតិ ត្រូវបានចាប់ខ្លួននៅលំនៅឋានរបស់ពួកគេក្នុងទីក្រុង Brisbane កាលពីថ្ងៃព្រហស្បតិ៍។ ពួកគេត្រូវបានកំណត់ឲ្យបង្ហាញខ្លួននៅក្នុងតុលាការក្រុង នៅថ្ងៃសុក្រនេះ។

លោក Kershaw និយាយថា ស្ត្រីដែលត្រូវបានចោទប្រកាន់គឺជាពលបាលនៅក្នុងកងកម្លាំងការពារជាតិប្រទេសអូស្ត្រាលី ហើយបានធ្វើការនៅទីនេះជាច្រើនឆ្នាំ ជាអ្នកបច្ចេកទេសប្រព័ន្ធព័ត៌មាន ហើយនាងបានធ្វើដំណើរ ដោយពុំបានប្រកាសទៅកាន់ប្រទេសរុស្ស៊ី ក្នុងអំឡុងពេលមានច្បាប់ឈប់សម្រាករយៈពេលយូរពីកងកម្លាំងការពារជាតិ។

លោកKershaw បាននិយាយថា ខណៈនាងនៅក្នុងប្រទេសរុស្ស៊ី តាមសេចក្តីរាយការណ៍ នាងបានប្រាប់ស្វាមីរបស់នាងពីរបៀបចូលទៅក្នុងគណនីផ្លូវការរបស់នាងនៅផ្ទះ។ យើងចោទប្រកាន់ថា ស្វាមីរបស់នាង នឹងចូលប្រើប្រាស់សម្ភារៈដែលបានស្នើសុំនោះ ហើយនឹងផ្ញើទៅប្រពន្ធរបស់គាត់នៅប្រទេសរុស្ស៊ី។

លោកបាននិយាយបន្ថែមថា យើងចោទប្រកាន់ថាពួកគេបានស្វែងរកព័ត៌មានដោយចេតនា ផ្តល់ទៅឱ្យអាជ្ញាធររុស្ស៊ី។