បណ្តាពលរដ្ឋដែលនិយមចូលចិត្តប្រើប្រាស់ថាមពលស្អាត ឬថាមពលអគ្គិសនីផ្ទាំង​សូឡា​នៅ​ខេត្តកណ្តាល បានបង្ហាញការយល់ដឹងបានច្បាស់ ក្រោយរដ្ឋមន្ត្រីក្រសួងរ៉ែ និងថាមពល បានថ្លែង​បញ្ជាក់ពីការមិនយកពន្ធ មិនមានការបង់ប្រាក់ និងតម្រូវឱ្យមានការប្រកាសអ្វីនោះទេ ចំពោះ​ពលរដ្ឋណាដែលប្រើប្រាស់ថាមពលអគ្គិសនីផ្ទាំងសូឡា ដែលមិនភ្ជាប់បណ្តាញ​អគ្គិសនី​សាធារណៈ។

ពលរដ្ឋថ្លែងប្រាប់ BTV នៅថ្ងៃទី១២ ខែកក្កដានេះថា អស់រយៈពេលជាយូរឆ្នាំមកហើយ ដែល​ពលរដ្ឋ​តាម​សហគមន៍ តាមកសិដ្ឋានតូចតាច បានប្រើប្រាស់ថាមពលអន្លឺព្រះអាទិត្យ ក្នុងទំហំតូច ដែល​សមល្មម នឹងប្រើប្រាស់បំភ្លឺផ្ទះ បំភ្លឺផ្លូវ និងប្រើម៉ូទ័របូមទឹក ឆ្នាំងដាំបាយ និង​បំភ្លឺ​តាម​សួន​ជា​ដើម ដែលមិនតភ្ជាប់ជាមួយប្រព័ន្ធខ្សែភ្លើងរបស់រដ្ឋ ហើយក្រោយ​ពីបាន​ស្តាប់​សេចក្តី​ណែនាំ​របស់​រដ្ឋ​មន្ត្រីក្រសួងរ៉ែ និងថាមពលនៅថ្ងៃម្សិលមិញនេះទៀត គឺបានធ្វើឲ្យពលរដ្ឋទាំងអស់គ្នាអស់​កង្វល់ និងយល់ថែមទៀត អំពីការមិនបង់ពន្ធនាំចូល មិនបង់ប្រាក់ថ្លៃប្រើប្រាស់អ្វីទាំងអស់ និង​មិន​ពាក់ព័ន្ធការចុះបញ្ជីស្នាមនានាឡើយ។

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានថ្លែងបញ្ជាក់ តាមហ្វេសបុក​ផ្លូវ​ការ​របស់​ខ្លួន​ថា ​ជាទូទៅគ្រប់បណ្តាញអគ្គីសនីពន្លឺព្រះអាទិត្យ ដែលពលរដ្ឋប្រើប្រាស់ក្នុងទំហំ​ប៉ុណ្ណា​ក៏​ដោយ ឲ្យតែមិនតភា្ជប់បណ្តាញអគ្គីសនីសាធារណៈ គឺមិនបាច់រាយការណ៍ ឬប្រកាស​នោះទេ។

ឯកឧត្តមបន្តថា បច្ចុប្បន្ន រាជរដ្ឋាភិបាលក៏មានបំណង់ចង់ជំរុញបណ្តាអាជីវកម្ម សហគ្រាស និង​ពលរដ្ឋ​ទូទៅប្រើប្រាស់ផងដែរ ខណៈ គ្រប់ពលរដ្ឋដែលដាក់ផ្ទាំងកញ្ចក់សូឡា លើដំបូលផ្ទះ ដំបូល​អគារអាជីវកម្ម ដើម្បីទាញយកថាមពលរដ្ឋអគ្គិសនីប្រើប្រាស់ក្នុងទំហំ ១០គីឡូវ៉ាត់​ចុះ​ក្រោម ហើយនៅពេលធ្វើស្វ័យប្រកាស គឺមិនតម្រូវឲ្យបង់ប្រាក់អ្វីទាំងអស់ ហើយរាជ​រដ្ឋាភិបាល​ក៏​មិន​បានយកពន្ធលើការនាំចូលផ្ទាំងសូឡានេះដែរ៕ អត្ថបទ ស៊ុម សុខជា