មន្រ្តីទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បាន​​ឲ្យដឹងថា ក្រៅពីការផ្សព្វផ្សាយព័ត៌មានការងារនៅតាមសាកលវិទ្យាល័យ និងគ្រឹះ​ស្ថាន​សិក្សា​នានា នៅពេលខាងមុខតទៀត នឹងបន្តនាំយកឱកាសការងារល្អៗជាច្រើនកន្លែងបន្ថែមទៀត ទៅ​ផ្សព្វផ្សាយជូនប្រជាពលរដ្ឋតាមខ្នងផ្ទះ និងបណ្តារោងចក្រ សហគ្រាស ដែល​មាន​តម្រូវ​ការ​ចាំបាច់​។

ក្នុងបទសម្ភាសន៍ជាមួយព័ត៌មាន ប៊ីធីវី លោក ឆោម សុខឿន ប្រធានមជ្ឈមណ្ឌល​ការងារ​រាជ​ធានី​ភ្នំពេញ នៃទីភ្នាក់ងារជាតិមុខរបរ និងការងារ បានមានប្រសាសន៍ឲ្យដឹងថា សកម្មភាព​មជ្ឈមណ្ឌល​ការងារចល័ត គឺចេញជារៀងរាល់ថ្ងៃ ពីថ្ងៃចន្ទ ដល់អាទិត្យ មិនថាតាម​សាកលវិទ្យាល័យ និងគ្រឹះស្ថានសិកស្សានានាប៉ុណ្ណោះទេ NEA ក៏នឹងនាំយក​ឱកាស​ការងារ​ទៅ​តាម​ខ្នងផ្ទះ តាមអាជ្ញាធរមូលដ្ឋាន ទៅតាមទីប្រជុំជន និងរមណីយដ្ឋានផ្សេងៗទៀត គឺក្រុមការងារ ទាំងមន្រ្តីរបស់ NEA និងយុវជនស្ម័គ្រចិត្ត ស.ស.យ.ក. វិស័យការងារ និងបណ្តុះបណ្តាលវិជ្ជាជីវៈ នឹងចុះទៅផ្សព្វផ្សាយតាមរយៈមជ្ឈមណ្ឌលការងារចល័ត ដូចជាការចុះឈ្មោះ ប្រឹក្សាយោបល់ ផ្តល់ពីការត្រៀមខ្លួន ផ្តល់ការងារធ្វើ ក៏ដូចជាផ្តល់ព័ត៌មានការងារល្អៗជាដើមទៅកាន់ពួកគាត់។

លោកបន្ថែមថា NEA នឹងបន្តរៀបចំជូនរហូត ហើយពាក់ព័ន្ធការងារក្នុងវិស័យរោងចក្រ គឺមានរហូតរាប់ពាន់ ម៉ឺនកន្លែង នៅតាមរោងចក្រ សហគ្រាស។ លោកបញ្ជាក់ទៀតថា នៅពេលដែលកម្មករ កម្មការនី មានបំណងចង់ចុះឈ្មោះស្វែងរកការងារធ្វើ គឺអាចទាក់ទងមកកាន់ NEA ដោយក្រុមការងារនឹងនាំយកឱកាសការងារទៅដល់ទីតាំងមូលដ្ឋាន និងដល់ផ្ទះតែម្តង ដើម្បីធ្វើការផ្សព្វផ្សាយជូន។

ពាក់ព័ន្ធការងារផ្សព្វផ្សាយព័ត៌មានអំពីឱកាសការងារនេះដែរ លោក ចាន់ ម៉េងហ៊ួរ មន្រ្តីផ្នែកធនធានមនុស្សមកពីធនាគារ ជីបម៉ុង និងលោក ឃី ម៉េងហួត មន្រ្តីផ្នែកធនធានមនុស្សដូចគ្នា មកពីគ្រឹះស្ថានមីក្រូហិរញ្ញវត្ថុ អេ អិម ខេ បានឲ្យដឹងថា ដោយសារការវិវឌ្ឍន៍ឥតឈប់ឈររបស់ក្រុមហ៊ុន ក៏ដូចជាឆ្លើយតបតម្រូវការរបស់អតិថនជនឲ្យបានល្អប្រសើរ ដូច្នេះតម្រូវការការងារនៅតែបន្តមាន និងគ្រប់មុខតំណែង។ ខណៈរហូតមកដល់ពេលនេះ ក្រុមហ៊ុនបានសហការក្នុងការផ្សព្វផ្សាយជ្រើសរើសកម្លាំងពលកម្ម ជាមួយ NEA ជាច្រើនលើកមកហើយ ហើយមូលហេតុដែលបន្តកិច្ចសហការនេះ ព្រោះ NEA បានដើរតួនាទីដ៏សំខាន់ក្នុងការជួយផ្សព្វផ្សាយពីតម្រូវការជ្រើសរើសបុគ្គលិកបានយ៉ាងទូលំទូលាយទៅដល់សាធារណជន ពិសេសអ្នកស្វែងរកការងារធ្វើ។

សូមរម្លឹកថា ក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការរបស់រាជរដ្ឋាភិបាលកម្ពុជា បានបង្កើតទីភ្នាក់ងារជាតិមុខរបរ និងការងារ(NEA) ដើម្បីឆ្លើយតបតម្រូវការការងារ ក៏ដូចជាផ្តល់នូវដំណោះស្រាយបញ្ហាទីផ្សារការងារ។ បន្ថែមពីនេះ មជ្ឈមណ្ឌលការងារចល័ត NEA ក៏បានបង្កើនការចុះផ្សព្វផ្សាយថែមទៀតអំពីឱកាសការងារនៅតាមសាកលវិទ្យាល័យ និងគ្រឹះស្ថានសិក្សានានា ឲ្យកាន់តែខិតជិតដល់យុវជន និងអ្នកស្វែងរកការងារ ដើម្បីបង្កើនលទ្ធភាពនៃការទទួលបានការងារកាន់តែឆាប់រហ័ស៕អត្ថបទ ឈិត បូរ៉ាវី