ក្រសួងសេដ្ឋកិច្ចប៉ាឡេស្ទីន បាននិយាយកាលពីថ្ងៃព្រហស្បតិ៍ថា ការហាមឃាត់របស់អ៊ីស្រាអែលលើការនាំចូលវត្ថុធាតុដើមជាង ១០០មុខ ចូលទៅក្នុងទីផ្សារប៉ាឡេស្ទីន បានបណ្តាលឲ្យមានការខាតបង់យ៉ាងធំធេងដល់ឧស្សាហកម្ម។

ក្រសួង បានឲ្យដឹងក្នុងសេចក្តីប្រកាសព័ត៌មានមួយថា សម្ភារៈដែលហាមឃាត់ ត្រូវបានប្រើប្រាស់ក្នុង     វិស័យផ្សេងៗ រួមមានស្បៀងអាហារ ផលិតផលធ្វើពីស្បែក វាយនភណ្ឌ សំណង់ វិស្វកម្ម និងសារធាតុគីមី នៅក្នុងដែនដីនេះ។

ក្នុងចំណោមសារធាតុហាមឃាត់ មានអាស៊ីតស៊ុលហ្វួរិក និងអាស៊ីតនីទ្រីក ដែលបានធ្វើឲ្យមានការខាតបង់យ៉ាងសំខាន់លើឧស្សាហកម្មពាក់ព័ន្ធ ដោយជំរុញឲ្យមានការបិទប្រតិបត្តិការមួយចំនួន។

ក្រសួងសេដ្ឋកិច្ច បាននិយាយថា អ៊ីស្រាអែលប្រើប្រាស់ការរឹតបន្តឹងលើទំនិញប្រើប្រាស់ពីរដង របស់របរ និងបច្ចេកវិទ្យា ដែលមានសមត្ថភាពបម្រើទាំងគោលបំណងស៊ីវិល និងយោធា ជាលេស ដើម្បីរារាំងការស្ទុះងើបសេដ្ឋកិច្ចរបស់ប៉ាឡេស្ទីន ដោយហេតុនេះទើបការពឹងផ្អែករបស់ទឹកដីប៉ាឡេស្ទីនលើសេដ្ឋកិច្ចអ៊ីស្រា  អែល កាន់តែកើនឡើង។

សេដ្ឋកិច្ចប៉ាឡេស្ទីន កំពុងប្រឈមមុខនឹងវិបត្តិដែលមិនធ្លាប់មានពីមុនមក គឺស្ថានភាពធ្ងន់ធ្ងរនៃការកើនឡើងភាពតានតឹង បន្ទាប់ពីថ្ងៃទី៧ ខែតុលា ឆ្នាំ ២០២៣ នៅពេលដែលអ៊ីស្រាអែល បើកការវាយលុកលើតំបន់ហ្កាហ្សាស្ទ្រីប។

រដ្ឋមន្ត្រីសេដ្ឋកិច្ចជាតិប៉ាឡេស្ទីន Mohammed Alamour បានព្រមានកាលពីខែឧសភាថា សេដ្ឋកិច្ចប៉ាឡេស្ទីន ត្រូវបានគេរំពឹងថា នឹងធ្លាក់ចុះ ១០ ភាគរយ នៅចុងឆ្នាំនេះ។