​

នគរបាលតំបន់ និយាយថា មនុស្ស១២ នាក់បានស្លាប់ និង៦៥នាក់ផ្សេងទៀត បានបាត់ខ្លួន បន្ទាប់ពីរថយន្តក្រុងរបស់ពួកគេ ត្រូវបានហូរនាំដោយបំណាក់ដី នៅក្នុងឧបទ្ទវហេតុដាច់ដោយឡែកពីគ្នាកាលពីយប់ថ្ងៃព្រហស្បតិ៍ និងនៅព្រឹកថ្ងៃសុក្រនេះ។

លោក Basant Kumar Sharma អ្នកនាំពាក្យនគរបាលស្រុក បាននិយាយថា កាលពីយប់ថ្ងៃព្រហស្បតិ៍ សមាជិក៧នាក់នៃគ្រួសារមួយ និងមនុស្សបីនាក់ទៀត បានស្លាប់ដោយសារបំណាក់ដី នៅស្រុក Kaski។

លោក Sharma និយាយថា យើងបានរកឃើញសាកសពចំនួន១១នាក់ ពីទីកន្លែងចំនួន៣ ហើយ ទន្ទឹមនឹងនេះដែរ អ្នកដំណើរចំនួន ៦៥នាក់ បានបាត់ខ្លួន បន្ទាប់ពីរថយន្តក្រុងពីរគ្រឿង ត្រូវបានហូរនាំដោយបំណាក់ដីនៅក្នុងស្រុក Chitwan ប្រទេសនេប៉ាល់។

រថយន្តក្រុងមួយគ្រឿង មានអ្នកដំណើរ ២៤ នាក់នៅលើនោះ បានធ្វើដំណើរទៅកាន់ទីក្រុង Kathmandu ពីទីក្រុង Birgunj ខណៈរថយន្តមួយគ្រឿងផ្សេងទៀតដឹកអ្នកដំណើរចំនួន ៤១ នាក់កំពុងធ្វើដំណើរទៅកាន់ក្រុងហ្គៅអឺ(Gaur) ពីទីក្រុង Kathmandu ។

លោក បេស រ៉ាច រីចាល់(Bhesh Raj Rijal) អ្នកនាំពាក្យនគរបាលស្រុក បាននិយាយថា រថយន្តក្រុងទាំងពីរគ្រឿង ត្រូវបានគេសង្ស័យថា បានធ្លាក់ចូលទៅក្នុងទន្លេ ទ្រីស៊្សូលី(Trishuli)។

នាយករដ្ឋមន្ត្រីប្រទេសនេប៉ាល់ លោក ពូស្បា កាម៉ាល់ ដាហាល់(Pushpa Kamal Dahal) បានបញ្ជាឱ្យកងកម្លាំងសន្តិសុខ ពន្លឿនកិច្ចខិតខំប្រឹងប្រែងជួយសង្គ្រោះ។

ទឹកជំនន់ និងបំណាក់ដីល្បប់ និងបំណាក់ដី បង្កឡើងដោយភ្លៀងធ្លាក់ខ្លាំង គឺជារឿងធម្មតានៅក្នុងប្រទេសនេប៉ាល់ក្នុងរដូវមូសុង ដែលជាធម្មតាចាប់ផ្តើមពីពាក់កណ្តាលខែមិថុនា ដល់ដើមខែតុលា។