អនុប្រធានរដ្ឋសភាឡាវ និងជាប្រធានសមាគមមិត្តភាពឡាវ-កម្ពុជា ឯកឧត្តម ខាំបៃ ដាំឡាត់ បានថ្លែងថា ឯកឧត្តមនឹងធ្វើការផ្សព្វផ្សាយ និងណែនាំបន្ថែមទៀតដល់ប្រជាពលរដ្ឋឡាវ ឲ្យ​មកដើរលេងកម្សាន្ត នៅខេត្តព្រះសីហនុ បន្ទាប់ពីឯកឧត្តមមើលឃើញថា ខេត្ត​ដែល​ជាប់​នឹង​ដែន​សមុទ្រ​របស់កម្ពុជាមួយនេះមានសក្តានុពលទេសចរណ៍ច្រើន មានសុវត្ថិភាព និងសណ្តាប់​ធ្នាប់​ល្អ​ប្រសើរ​ផងដែរ។

នៅក្នុងកិច្ចសម្ភាសន៍ជាមួយទូរទស្សន៍BTV ក្រោយបញ្ចប់ទស្សនកិច្ចនៅរាជធានីភ្នំពេញ និង​ខេត្តព្រះសីហនុ រយៈពេល៥ថ្ងៃ គឺចាប់ពីថ្ងៃទី៨ ដល់ថ្ងៃទី១២ ខែកក្កដា ឆ្នាំ២០២៤នេះ ឯកឧត្តម ខាំបៃ ដាំឡាត់ បាន លើកឡើងថា ឯកឧត្តមពិតមាន​មោទនភាព​យ៉ាង​ខ្លាំង​ដែល​បាន​មក​លេង​កម្សាន្ត​នៅខេត្តព្រះសីហនុ ដែលជា ខេត្តមួយសម្បូរបែបខាងសក្តានុពលទេសចរណ៍ មានភាព​រីក​ចម្រើន​ខ្លាំង ទាំងអគារខ្ពស់ៗ ហេដ្ឋារចនាសម្ព័ន្ធ  និងអ្នកវិនិយោគិនបរទេសជាច្រើន ដែលធ្វើឲ្យ​មាន​ការ​ទាក់ទាញយ៉ាងខ្លាំងសម្រាប់ប្រជាជនឡាវ ដូច្នេះឯកឧត្តម នឹងខិតខំធ្វើការ​ណែនាំដល់​ប្រជាជន​ឡាវ​ណាដែលមានលទ្ធភាពឲ្យពួកគេមកលេខកម្សាន្តនៅខេត្តនេះ ឲ្យបានញឹកញាប់ និង​ធ្វើការសិក្សាដើម្បីធ្វើការរកស៊ីផងដែរ។

តាមរយៈកិច្ចសម្ភាសន៍ជាមួយទូរទស្សន៍ BTVនេះដែរ ឯកឧត្តម ខាំបៃ ដាំឡាត់​ក៏​បាន​លើក​ឡើង​ផង​ដែរថា ប្រជាជនកម្ពុជាពិតជាមានសំណាង ដែលបានរស់នៅក្រោមម្លប់សន្តិភាព និងមាន​ការ​អភិវឌ្ឍ​រីក​ចម្រើនជាបន្តបន្ទាប់ ខណៈភាពរីកចម្រើន​ទាំងនេះ​គឺ​បាន​កើត​ចេញ​ពី​ប្រទេស​មាន​សុខសន្តិភាព និងស្ថិរភាពនយោបាយ ដូច្នេះក្នុងនាមឯកឧត្តមជាអ្នកជិតខាងដ៏ល្អជាមួយកម្ពុជា ឯកឧត្តមរំពឹងថាភាពរីកចម្រើនទាំងនេះនឹងកើតមាន ឡើងនៅប្រទេសកម្ពុជា ជារៀងរហូត។ មួយ​វិញទៀតឯកឧត្តមរំពឹងថា ប្រជាជនកម្ពុជា និងប្រជាជនឡាវកាន់ ស្គាល់គ្នា និងស្រលាញ់​គ្នា​ជិត​ស្និទ្ធ​បន្ថែមទៀតតាមរយៈកិច្ចព្រមព្រៀងរបស់ថ្នាក់ដឹកនាំនៃប្រទេសទាំងពីរ និង តាមរយៈ​សមាគម​មិត្តភាពកម្ពុជា-ឡាវ និងឡាវ-កម្ពុជានោះ។

សូមបញ្ជាក់ថា លោកខាំបៃ ដាំឡាត់ បានបំពេញទស្សនកិច្ចនៅកម្ពុជារយៈពេលប្រាំថ្ងៃ គឺ​ចាប់​ពីថ្ងៃទី៨ដល់ថ្ងៃទី១២ ខែកក្កដា ឆ្នាំ២០២៤នេះ តបតាមការ​អញ្ជើញ​របស់​ប្រធាន​សមាគម​មិត្តភាព​កម្ពុជា-ឡាវ។ ក្នុង ដំណើរទស្សនកិច្ចនេះលោកបានជួបពិភាក្សាការងារជាមួយឯកឧត្តម នាង ផាត ប្រធានសមាគមមិត្តភាពកម្ពុជា -ឡាវ និងមន្ត្រីកម្ពុជាមួយចំនួនទៀត។ ក្រៅពីកិច្ច​ជំនួប​ជា​មួយ​មន្ត្រីកម្ពុជាឯកឧត្តមបានធ្វើទស្សនកិច្ចនៅសារមន្ទីរជាតិកម្ពុជា ទស្សនកិច្ចនៅវិមាន ឈ្នះ ឈ្នះ និងធ្វើទស្សនកិច្ចនៅខេត្តព្រះសីហនុជាដើម៕ អត្ថបទ បាន ចក់