ប្រទេសជប៉ុន ជាថ្មីម្ដងទៀត បានកំណត់ប្រទេសចិន កូរ៉េខាងជើង និងរុស្ស៊ីថា ជាការគំរាមកំហែងដ៏ធំរបស់ខ្លួន នៅក្នុងរបាយការណ៍ការពារជាតិប្រចាំឆ្នាំ នៅថ្ងៃសុក្រ (ទី១២ ខែកក្កដា) នេះ ទោះបីជាការចេញផ្សាយរបស់ខ្លួន ត្រូវបានគ្របដណ្ដប់ដោយការបញ្ចប់តំណែងមន្ត្រីជាន់ខ្ពស់របស់កងទ័ពជើងទឹក ចំពេលមានរឿងអាស្រូវកើតឡើងក៏ដោយ។

ឯកសារការពារជាតិកម្រាស់ ៥៤៨ទំព័រ ដែលប្រទេសជប៉ុនបានដាក់ខ្លួនឯងថា ស្ថិតនៅក្នុង «បរិយាកាសសន្តិសុខធ្ងន់ធ្ងរ និងស្មុគស្មាញបំផុតនៃសម័យក្រោយសង្គ្រាម» បានកើតឡើងនៅពេលដែលកងកម្លាំងស្វ័យការពារ (SDF) ប្រារព្ធខួបលើកទី៧០ នៃការបង្កើតអង្គភាពនេះ នៅថ្ងៃទី១ ខែកក្កដា ឆ្នាំ១៩៥៤។

ប៉ុន្តែចំណុចគួរឲ្យចាប់អាមរម្មណ៍ខ្លាំងនោះ ត្រូវបានគ្របដណ្តប់ដោយរឿងអាស្រូវយោធា ដែលពាក់ព័ន្ធនឹងភាពមិនត្រឹមត្រូវផ្នែកហិរញ្ញវត្ថុ និងអំពើពុករលួយ ព្រមទាំងការចោទប្រកាន់ពីការគ្រប់គ្រងខុសនូវព័ត៌មានសម្ងាត់របស់រដ្ឋ និងការបៀតបៀននៅកន្លែងធ្វើការ។

ក្រសួងការពារជាតិ នៅថ្ងៃទី១២ ខែកក្កដានេះ បាននិយាយថា ខ្លួនបានដាក់ទណ្ឌកម្មសមាជិក SDF និងបុគ្គលិកការិយាល័យជាន់ខ្ពស់ចំនួន ២១៨នាក់ ដោយមានការបណ្តេញចេញចំនួន ១១នាក់ ការទម្លាក់តួនាទីចំនួន២នាក់ និងការព្យួរការងារចំនួន ៨៣នាក់។ អ្នកផ្សេងទៀតត្រូវកាត់ប្រាក់ខែ ទទួលការស្តីបន្ទោសជាផ្លូវការ ឬការព្រមាន។

ជាមួយគ្នានេះ មន្ត្រីជាន់ខ្ពស់របស់កងទ័ពជើងទឹក ឧត្តមនាវីឯក លោក Ryo Sakai ត្រូវបានបញ្ចប់តំណែង ខណៈរឿងរ៉ាវចម្រូងចម្រាសនេះភាគច្រើនពាក់ព័ន្ធនឹងកងកម្លាំងស្វ័យការពារដែនសមុទ្រ (MSDF)៕