ដោយមានការសម្របសម្រួលជាមួយកងកម្លាំងប្រដាប់អាវុធហ្សកដានី អង្គការសប្បុរសធម៌ Jordan Hashemite កាលពីព្រហស្បតិ៍ បានបញ្ជូនជំនួយចំនួន៥០រថយន្ត ទៅកាន់តំបន់ហ្កាហ្សាស្ទ្រីប ដើម្បីសម្រាលវិបត្តិមនុស្សធម៌ នៅក្នុងទឹកដីនេះ។

ទីភ្នាក់ងារសារព័ត៌មានរដ្ឋ Petra បានរាយការណ៍ថា ក្បួនរថយន្តនោះ រួមមានស្បៀងអាហារ ការផ្គត់ផ្គង់ថ្នាំពេទ្យ ថ្នាំសម្លាប់មេរោគ ភួយ ពូក សំលៀកបំពាក់ និងស្បែកជើង។

កញ្ចប់ជំនួននេះ ត្រូវបានរៀបចំដោយសហការជាមួយកម្មវិធីអាហារពិភពលោក និងគាំទ្រដោយមូលនិធិ  សង្គ្រោះកុមារប៉ាឡេស្ទីន អង្គការគ្រូពេទ្យគ្មានព្រំដែន សមាគមសង្គ្រោះផ្នែកវេជ្ជសាស្ត្រប៉ាឡេស្ទីន និង    អង្គភាពផ្សេងៗទៀត។

លោក Hussein Al-Shibli អគ្គលេខាធិការនៃអង្គការសប្បុរសធម៌ បាននិយាយថា ជំនួយសរុបចំនួន ២.៥៦៣រថយន្ត ពីប្រទេសហ្ស៊កដានី បានចូលទៅក្នុងតំបន់ហ្កាហ្សាស្ទ្រីប ខណៈដែលជំនួយដឹកតាមយន្តហោះចំនួន ៥៣គ្រឿងទៀត ឆ្លងកាត់អាកាសយានដ្ឋាន El-Arish របស់ប្រទេសអេហ្ស៊ីប។