អ្នកទេសចរ ២នាក់ បានបាត់បង់ជីវិត នៅពេលដែលពួកគេជាប់ក្នុងទឹកជំនន់យ៉ាងគំហុកភ្លាមៗ នៅតំបន់ភ្នំ High Tatra របស់ប្រទេសស្លូវ៉ាគី កាលពីថ្ងៃព្រហស្បតិ៍ (ទី១១ ខែកក្កដា)។ នេះបើតាមការឲ្យដឹងពីអភិបាលតំបន់ ដែលប្រាប់ស្ថានីយទូរទស្សន៍ក្នុងស្រុកមួយ។

ទូរទស្សន៍ក្នុងស្រុក Joj TV បានរាយការណ៍ថា ព្យុះដ៏ខ្លាំងនៅភាគកណ្តាលប្រទេសស្លូវ៉ាគី បណ្តាលឲ្យមានទឹកជំនន់នៅទូទាំងតំបន់។

លោក Pavol Bekes អភិបាលតំបន់ Zdiar បានប្រាប់ទូរទស្សន៍ Joj ថា ក្រុមអ្នកទេសចរ ១៦នាក់ បានលាក់ខ្លួន នៅក្នុងជម្រកមួយដែលត្រូវបានវាយប្រហារដោយទឹកជំនន់ ដោយមនុស្ស ៤នាក់របស់ក្រុមនេះ បានរងរបួស ហើយ ២នាក់ទៀត ស្លាប់ នៅពេលក្រុមអ្នកជួយសង្គ្រោះចូលទៅដល់កន្លែងពួកគេ។

ទូរទស្សន៍ Joj បានផ្សាយថា អ្នកនាំពាក្យឲ្យក្រុមដែលជួយជម្លៀសអ្នករបួសតាមឧទ្ធម្ភាគចក្រ បាននិយាយថា ក្រុមអ្នកទេសចររងរបួសនោះ មានមនុស្សពេញវ័យ ៣នាក់ និងកុមារម្នាក់ ហើយពួកគេត្រូវបាននាំទៅកាន់មន្ទីរពេទ្យក្នុងតំបន់៕