រដ្ឋាភិបាលអាល្លឺម៉ង់ កាលពីថ្ងៃសុក្រ (ទី១២ ខែកក្កដា) នេះ បាននិយាយថា ទីក្រុងប៊ែរឡាំង កំពុងពិនិត្យយ៉ាងល្អិតល្អន់បំផុត ចំពោះរបាយការណ៍អំពីផែនការធ្វើឃាតលើនាយកប្រតិបត្តិនៃក្រុមហ៊ុនផលិតអាវុធ Rheinmetall ហើយបន្ថែមថា នឹងមិនមានការភ័យខ្លាច ចំពោះការគំរាមកំហែងរបស់រុស្ស៊ីនោះឡើយ។

សារព័ត៌មាន CNN និង New York Times កាលពីថ្ងៃព្រហស្បតិ៍ (ទី១១ ខែកក្កា) បានរាយការណ៍ថា ចារកម្មអាមេរិក បានរកឃើញផែនការរបស់រុស្ស៊ី ដែលចង់សម្លាប់លោក Armin Papperger នាយកប្រតិបត្តិក្រុមហ៊ុន ដែលផលិតគ្រាប់កាំភ្លើងធំ និងរថយន្តយោធា សម្រាប់ប្រទេសអ៊ុយក្រែន។

ហើយសារព័ត៌មាន CNN បានរាយការណ៍ថា នេះគឺជាផែនការមួយ ក្នុងចំណោមផែនការជាច្រើនរបស់រុស្សី ដែលចង់ធ្វើឃាតនាយកប្រតិបត្តិឧស្សាហកម្មការពារជាតិ នៅទូទាំងទ្វីបអឺរ៉ុប ដែលគាំទ្រដល់កិច្ចខិតខំប្រឹងប្រែងធ្វើសង្គ្រាមរបស់អ៊ុយក្រែន។ សារព័ត៌មាននេះ បានបន្ថែមថា ទីក្រុងវ៉ាស៊ីនតោន បានជូនដំណឹងនេះដល់ប្រទេសអាល្លឺម៉ង់ និងសេវាសន្តិសុខអាល្លឺម៉ង់ ដែលអាចការពារលោក Papperger បាន។

រដ្ឋមន្ត្រីមហាផ្ទៃអាល្លឺម៉ង់ លោកស្រី Nancy Faeser បាននិយាយថា៖ «យើងនឹងមិនឲ្យរុស្ស៊ីបំភិតបំភ័យយើងឡើយ ហើយយើងនឹងបន្តធ្វើអ្វីគ្រប់យ៉ាងដែលអាចធ្វើបាន ដើម្បីការពារការគំរាមកំហែងរបស់រុស្ស៊ីនៅក្នុងប្រទេសអាល្លឺម៉ង់»។

ក្រុមហ៊ុន Rheinmetall មិនបានបញ្ជាក់ដោយផ្ទាល់នូវរបាយការណ៍នេះទេ ប៉ុន្តែបានប្រាប់ឲ្យដឹងនៅក្នុងសេចក្តីថ្លែងការណ៍ថា «វិធានការចាំបាច់តែងតែត្រូវបានធ្វើឡើងជានិច្ច» ដើម្បីធានាសន្តិសុខ ដោយមានការពិគ្រោះយោបល់ជាទៀងទាត់ជាមួយអាជ្ញាធរសន្តិសុខ។

ចំណែកវិមានក្រឹមឡាំង បានបដិសេធរបាយការណ៍នេះថា ជាព័ត៌មានក្លែងក្លាយ ដោយផ្អែកលើប្រភពអនាមិក ហើយបាននិយាយថា ព័ត៌មាននេះមិនអាចត្រូវបានយកចិត្តទុកដាក់យ៉ាងខ្លាំងនោះទេ៕