នាយករដ្ឋមន្ត្រីនេប៉ាល់ លោក Pushpa Kamal Dahal បានបរាជ័យនៅក្នុងការបោះឆ្នោតផ្ដល់ទំនុកចិត្តសភា នៅថ្ងៃសុក្រ (ទី១២ ខែកក្កដា) ដោយបញ្ចប់អាណត្តិដ៏ច្របូកច្របល់រយៈពេល ២០ខែ ដែលបានឃើញថា រូបលោកទទួលបានជោគជ័យក្នុងការបោះឆ្នោតបែបនេះចំនួន ៤ដង ហើយលទ្ធផលនេះបើកផ្លូវឲ្យមានការបង្កើតរដ្ឋាភិបាលចម្រុះថ្មីមួយ។

លោក Dahal វ័យ ៦៩ឆ្នាំ ត្រូវបានបង្ខំឲ្យលាលែងពីតំណែង ឬបើមិនដូចច្នោះទេ ត្រូវទទួលបានសំឡេងគាំទ្រភាគច្រើន នៅក្នុងសភា បន្ទាប់ពីសម្ព័ន្ធមិត្តដ៏ធំបំផុតរបស់លោក គឺគណបក្សសេរីនិយម UML (កុម្មុយនីស្តបង្រួបបង្រួមម៉ាក្សលេនីននិយម) បានដកការគាំទ្រដល់រដ្ឋាភិបាលរបស់លោក កាលពីសប្តាហ៍មុន។

រូបលោកត្រូវការយ៉ាងហោចណាស់សំឡេងគាំទ្រ ១៣៨សំឡេង នៅក្នុងសភាដែលមានសមាជិក ២៧៥នាក់ ដើម្បីបន្តកាន់អំណាច។ សមាជិកសភាសរុបចំនួន ៦៣នាក់ ក្នុងចំណោម ២៥៨នាក់ ដែលមានវត្តមាន នៅក្នុងសភា បានបោះឆ្នោតគាំទ្រ លោក Dahal នៅថ្ងៃសុក្រនេះ ខណៈដែល ១៩៤នាក់ បានបោះឆ្នោតប្រឆាំងនឹងលោក ហើយសមាជិកសភាម្នាក់ បានបោះឆ្នោតអនុបវាទ៕