ភ្នំពេញ ៖ក្រសួងបរិស្ថាន នៅរសៀលថ្ងៃទី ១២ ខែកក្កដា ឆ្នាំ២០២៤  បានរៀបចំពិធីបិទពិព័រណ៍ផ្សព្វផ្សាយ និងចែកកូនឈើ ក្រោមមូលបទ «ពន្លកបៃតង» និងវេទិការកេសរកូលជាតិលើកទី៤ ក្រោមអធិបតីភាព ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ដោយមានការអញ្ជើញចូលរួមពីតំណាងក្រសួង-ស្ថានប័ន ស្ថានទូត និងដៃគូពាក់ព័ន្ធផ្សេងៗទៀត។

នៅក្នុងអង្គពិធី ឯកឧត្តមរដ្ឋមន្ត្រី បានថ្លែងថា ក្នុងពិព័រណ៍រយៈពេលបីថ្ងៃ ចាប់ពីថ្ងៃទី១០-១២ ខែកក្កដា ក្រសួងបរិស្ថានបានផ្តល់កូនឈើចម្រុះជាង៩២ម៉ឺនដើម រាប់បញ្ចូលទាំងប្រជាពលរដ្ឋមកទទួលយ កនៅទីស្ដីការក្រសួងបរិស្ថានដោយផ្ទាល់ និងប្រជាពលរដ្ឋបានចុះឈ្មោះ ដើម្បីទទួលយកនៅក្រោយពិព័រណ៍បញ្ចប់។

ឯកឧត្តមបន្តថា ឆ្នាំនេះជាឆ្នាំលើកដំបូងនៃការធ្វើពិព័រណ៍កូនឈើ បញ្ចប់ទៅដោយជោគជ័យ ហើយនៅឆ្នាំក្រោយក្រសួងបរិស្ថាននឹងធ្វើនៅរាជធានីភ្នំពេញជាថ្មីម្ដងទៀត ដើម្បីបំផុសការដាំដើមឈើរបស់ប្រជាពលរដ្ឋ។ ចំណែកនៅឆ្នាំបន្តបន្ទាប់ទៀតនឹងប្រគល់ឱ្យធ្វើនៅតាមបណ្តារាជធានី ខេត្តជាអ្នករៀបចំ៕ បន្ថែមលើនេះ ឯកឧត្តមបន្តអំពាវនាវដល់អ្នកពាក់ព័ន្ធទាំងអស់ ចូលរួមក្នុងយុទ្ធនាការនានាដែលរៀបចំឡើងដោយក្រសួងបរិស្ថាន ដើម្បីភាពស្អាត ភាពបៃតង ធ្វើយ៉ាងណាឱ្យមានចីរភាព តាមរយៈការបណ្តុះ ពន្លកនៃភាពស្អាត ពន្លកនៃភាពបៃតង នេះជាបន្តទៀត ដើម្បីឱ្យប្រទេសកម្ពុជាទទួលបាននូវភាពស្អាត ភាពបៃតង រយៈពេលវែង ស័ក្ដិសមជាអរិយប្រទេស។

គួរបញ្ជាក់ដែរថា ការៀបចំពិព័រណ៍ផ្សព្វផ្សាយ និងចែកកូនឈើ គឺជាការឆ្លើយតបទៅនឹងកម្មវិធីគោលនយោបាយរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ដែលដឹកនាំដោយសម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងការអនុវត្តតាមយុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨ ដែលបានផ្តោតលើមុំបីសំខាន់ គឺស្អាត បៃតង និងចីរភាព។ ម្យ៉ាងវិញទៀត គឺជាការជំរុញឱ្យប្រទេសកម្ពុជាឆ្ពោះទៅជាប្រទេសអព្យាក្រឹតកាបូន និងមានគម្របព្រៃឈើចំនួន៦០% នៅឆ្នាំ២០៥០។ អត្ថបទ៖ទូច សោភ័ណ