កំពង់ឆ្នាំង៖ រហូតមកដល់ថ្ងៃទី១៣ ខែកក្កដា ឆ្នាំ២០២៤នេះ ជនសង្ស័យ៤នាក់ ដែលបានឈូសបំផ្លាញព្រៃលិចទឹកក្នុងតំបន់អាងមេទឹកយកដីអស់ជាង៣ហិកតា បាន និងកំពុងព្យាយាមរត់គេចពីផ្លូវច្បាប់ដោយមិនទទួលខុសត្រូវលើសកម្មភាពល្មើសរបស់ខ្លួននោះឡើយ ។ លោក លី ឡា នាយខណ្ឌរដ្ឋបាលជលផលកំពង់ឆ្នាំង បានទុកពេលអោយជនសង្ស័យទាំង៤នាក់ ចូលខ្លួនមកបំភ្លឺពាក់ព័ន្ធនឹងការឈូសឆាយបំផ្លាញព្រៃលិចទឹកនេះ នៅខណ្ឌរដ្ឋបាលជលផល ១យៈពេល១សប្តាហ៍ហើយ តែជនសង្ស័យទាំង៤នាក់ បានព្យាយាមរត់គេចពីការទទួលខុសត្រូវទាំងអស់ មិនចូលខ្លួនឡើយ។

 លោក លី ឡា បានបន្តថា៖ ពេលនេះ លោកបានកសាងសំណុំរឿងបញ្ជូនជនសង្ស័យទាំង៤នាក់ដែលបានឈូសបំផ្លាញព្រៃលិចទឹកអស់៣០៦៨៧ម៉ែត្រការ៉េ នៅចំណុចមេទឹកប្រាំងចាស់ ស្ថិតក្នុងភូមិដូនវៀត ឃុំកំពង់ហាវ ស្រុកកំពង់លែង ខេត្តកំពង់ឆ្នាំង ទៅអយ្យការអមសាលាដំបូងខេត្តរួចរាល់ហើយ ដែលក្នុងនោះមានឈ្មោះ រស់ សារ៉ាត់ អាយុ៧៣ឆ្នាំ, ឈ្មោះ ហែម សួរ អាយុ៦៩ឆ្នាំ, ឈ្មោះ ស៊ន សម្បត្តិ អាយុ៤៩ឆ្នាំ, និងឈ្មោះ កេត សុខ អាយុ៥៧ឆ្នាំ ជាប្រធានប្រជាការពារភូមិដូនវៀតដែលបាននាំត្រាក់ទ័រចូលពីចន្លោះថ្ងៃទី១៤ដល់ថ្ងៃ២៤ ខែមិថុនា ឆ្នាំ២០២៤ ដើម្បីធ្វើសកម្មភាពឈូសបំផ្លាញព្រៃលិចទឹក។

ដោយឡែក ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង ក្រោយការចុះពិនិត្យនៅលើទីតាំងប្រព្រឹត្តបទល្មើសឈូសបំផ្លាញព្រៃលិចទឹកអស់ចំនួន៣០៦៨៧ម៉ែត្រការ៉េ នៅចំណុចមេទឹកប្រាំងចាស់ ស្ថិតក្នុងភូមិដូនវៀត ឃុំកំពង់ហាវ ស្រុកកំពង់លែង ខេត្តកំពង់ឆ្នាំងរួចមក ឯកឧត្តមក៏បានអំពាវនាវដល់ប្រជាពលរដ្ឋទាំងអស់ សូមជួយថែរក្សាតំបន់ព្រៃលិចទឹកអោយបានគង់វង្ស កុំចូលឈូសទន្ទ្រាន ឬកាប់ដុតបំផ្លាញអោយសោះ ព្រោះព្រៃលិចទឹកមានសារៈប្រយោជន៍ខ្លាំងណាស់សំរាប់ជាប្រយោជន៍ដល់ជីវិតមនុស្ស និងជាជម្រកត្រីពងកូន មច្ឆាជាតិ សត្វស្លាប រួមនឹងការជួយទប់ស្កាត់ការបំរែបំរួលអាកាសធាតុផងដែរ។ ប្រសិនបើបងប្អូន ពាក់ព័ន្ធនឹងករណីល្មើសទាំងនោះហើយ បងប្អូននឹងត្រូវប្រឈមមុខជាមួយផ្លូវច្បាប់ជាមិនខាន និងអាចគេចរួចនោះឡើយ ៕ ដោយ ៖ កាំង ហុងវាស្នា